Shabdatarangini p397

p397

āropitaśakyatāvacchedakarūpeṇa śakyatvena prasiddhanyavyaktibodhe iti na caivamāropitagaṅgātvena bodhe iti ca granthaparyālocanāyāṃ āropitagaṅgātvena tīrabodhaḥ iti pratibhāti .
parantu, śaktyā bodhaviśeṣe lakṣaṇāvyavahāraḥ ityupakrāntam .
āropitatvaviśiṣṭaṃ ca gaṅgātvaṃ na gaṅgāpadaśakyatāvacchedakamiti tena rīpeṇa śaktyā bodho na sambhavati .
āropitatvabodhakaṃ ca padaṃ nāsti, yena gaṅgātve āropitatvasya bodho bhavet na cāropitatvasyaprakāratayā bhānāsambhave'pi gaṅgātvasaṃsargatayā bhānaṃ syāditi vācyam .
samavāyātiriktasambandhena jāteḥ svarūpataḥ prakāratayā bhānāsambhavāt .
na ca prakāritāṃśe nirūpitatvasambandhena svarūpato gotvāvāgāhinaḥ anubhavavyavasāyasyānurodhāt samavāyātiriktanirūpitatvasambandhenāpi svarūpato bhānāt, lākṣaṇikasthalīyānubhavānurodhāt āropasambandhenāpi gaṅgātvasya (jāteḥ) svarūpato bhānaṃ sambhavatīti vācyam .
samavāyasaṃsargakagaṅgātvaprakārakaśābdabodhasyaiva gaṅgāpadaśaktijñānaprayojyatvena āropasaṃsargakagaṅgātvaprakārakabodhasya śaktiprayojanatvābhāvena śaktyaiva bodhe lakṣaṇāvyavahāraḥ iti granthāsaṃṅgateḥ .
tādṛśabodhasya bhramatvānāpatteśca .
tīre samavāyena gaṅgātvasyāsattve'pi āropasambandhena sattvāt .
na caiṣṭāpattiḥ .
lakṣyārthabodhe bhramatvajñānānudayaprayojakakathanasyāsaṃgatatvāpatteḥ .
tasmāt samavāyenaiva gaṅgātvaṃ tīre bhāsate .
evañca bodhasya śaktiprayojyatvaṃ bhramatvañcopapadyate .