Viramitrodaya 1.p135

1.p135

adīnamaśrusnigdhaṃ ca sasmitaṃ ca viśeṣataḥ || sāśru dīnaṃ tathā rūkṣamasnigdhaṃ ca tathā guha | aśubhāvahaṃ vijñeyaṃ narāṇāṃ vāridhāraṇam || iti | iti ruditalakṣaṇam | atha bhrūlakṣaṇam | bhaviṣye, dhruvau bālendusadṛśe dhanināmṛṣabhottama | dīrghābhirdhanino jñeyāḥ saṃsaktābhiśca suvrata || khaṇḍābhyāṃ tvarthahīnāḥ syurnarā bhrūbhyāṃ surottama | madhye nate dhruvau yeṣāṃ paradāraratāstu te || iti | varāhasaṃhitāyām, viṣamabhruvo daridrā bālendusamadhruvaḥ sadhanāḥ | iti | sāmudratilake, bālendunate vṛtte dīrghe pṛthulonnate sukhaṃ śyāme | nāsāvaṃśavinirgatadale iva bhrūdale diśataḥ || nṛṇāmayute snigdhe mṛdunataromānvite dhruvau śaste | hīne sthūle sūkṣme kharapiṅgalaromake na śubhe || iti | iti bhrūlakṣaṇam | atha karṇalakṣaṇam | varāhasaṃhitāyām, nirmāsaiḥ karṇaiḥ pāpamṛtyavaścipiṭaiḥ subahubhogāḥ | kṛpaṇāśca hrasvakarṇāḥ śaṅkuśravaṇāśca bhūpatayaḥ || romaśakarṇā dīrghāyuṣo'tha dhanabhogino vipulakarṇāḥ | krūrāḥ śirāvanaddhairvyālambairmāṃsalaiḥ sukhinaḥ || iti | bhaviṣye, dīrghāyuṣo dīrghakarṇā lambakarṇāstapasvinaḥ | iti | sāmudratilake, paripūrṇakarṇapālīpippalikāyavayavāḥ susaṃsthānāḥ | laghuvivarā vistīrṇāḥ karṇāḥ prāyeṇa bhūmibhujām || āḍhyaḥ pralambakarṇaḥ sukhī śubhāvarttapīnamṛduvarṇaḥ | matimānmūṣakakarṇaścabhūpatiḥ śaṅkukarṇaḥ syāt || yeṣāṃ pṛthulacchidrāḥ karṇāḥ syuḥ karṇaśaṣkulīlīnāḥ | svalpāyuṣo daridrā vilokyamānā virūpāste || iti | iti karṇalakṣaṇam | atha lalāṭalakṣaṇam | bhaviṣye, lalāṭenārdhacandreṇa bhavanti pṛthivīśvarāḥ | vipulena lalāṭena mahānarapatiḥ smṛtaḥ || ślakṣṇena tu lalāṭena naro dharmaratastathā | ślakṣṇaṃ snigdham | triśūlaṃ paṭṭiśaṃ vāpi lalāṭe yasya dṛśyate | īśvaraṃ taṃ vijānīyādbhoginaṃ kīrtimāśritam || vipulairunnataiḥ śaṅkhairdhanyāḥ syurnātra saṃśayaḥ | śaṅkho lalāṭāsthi | nimnaiḥ sutārthasantyaktā unnataiśca narādhipāḥ | viṣamalalāṭā niḥsvāḥ sadā syurdevasattama || ācāryāḥ śuktisadṛśairnarāḥ syurnātra saṃśayaḥ | iti | varāhasaṃhitāyām, śuktiviśālairācāryāḥ śirāsannatairadharmaratāḥ | śuktiviśālaiḥ śuktivadvistīrṇaiḥ | unnataśirābhirāḍhyāḥ svastikavatsaṃsthitābhiśca