Viramitrodaya 1.p174

1.p174

kāsaśvāsādiṃsaṃyuktāṃ nidrāśīlāṃ ca nodvahet || anarthabhāṣiṇīṃ caiva lokadveṣaparāyaṇām | pacāpavādaniratāṃ taskarāṃ nodvahedbudhaḥ || dīrghanāsāṃ ca kitavāṃ tanūruhavibhūṣitām | garvitāṃ vakravṛttaṃ ca sarvathā nodvahedbudhaḥ || iti | pṛthvīcandrodaye vyāso'pyāha, hrasvā dīrghāḥ kṛśāḥ sthūlāḥ piṅgākṣyau gaurapāṇḍurāḥ| na pūjyā na ca sevyāstā yato mṛtyukārāḥ striyaḥ || iti | garuḍapurāṇe, vakrakeśā tu yā kanyā maṇḍalākṣī ca yā bhavet | bharttā ca mriyate tasyā niyataṃ duḥkhabhāginī || yasyāstu romalau pādau romaśau ca payodharau | unnatau cādharoṣṭhau ca kṣipraṃ mārayate patim || yasyāstvanāmikāṅguṣṭhau pṛthivyāṃ naiva tiṣṭhataḥ | patiṃ mārayate kṣipraṃ svecchācāreṇa varttate || iti | nāgarakhaṇḍe'pi, tathā tribhiḥ stanairyuktāṃ pṛṣṭhāvarttakasaṃyutām | daridro'pyatiduḥkhyo'pi kulahīno'pi nodvahet || dīyamānāṃ ca tāṃ vai yaḥ pratigṛhṇāti kaścana | taṃ bhakṣayati bharttāraṃ ṣaṇmāsābhyantare hi sā || yasyāḥ syurdviguṇā dantā etatsāmudrikā jaguḥ | tristanī kanyakā yā tu śvaśurasya kulakṣayam || sā dhatte nātra sandehastasmāttāṃ dūratastyajet | pṛṣṭhāvartto bhavedyasyā asatī sā bhaved‌dhruvam || bahupāpasamācārā tasmāttāṃ parivarjayet | iti | atha ābhyantarāṇi | tānyāśvalāyanoktāni'yathā, durvijñeyāni lakṣaṇānyaṣṭau piṇḍān kṛtvā ṛtamagre prathamaṃ yajñaṛte satyaṃ pratiṣṭhitaṃ yadidaṃ kumāryabhijātā tadiyamiha pratipadyatāṃ yatsatyaṃ taddṛśyatāmiti piṇḍānabhimantrya kumārīṃ brūyādeṣāmekaṃ gṛhāṇeti | kṣetrāñcedubhayataḥsasyāṃdṛglīyādannavatyasyāḥ prajā bhaviṣyatīti vidyāt goṣṭhātpaśumatī vedipurīṣādbrahmavarcasvinyavidāsino hṛdātsarvasampannā devanātkitavī catuṣpathādvipravājinīriṇādadhanyā śmaśānātpatighnīti