Viramitrodaya 1.p177

1.p177

āpādatalamārabhya yāvanmauli tvahaṃ kramāt | śubhāśubhāni vakṣyāmi lakṣaṇāni mune śṛṇu || ādau pādatale rekhā tato'ṅguṣṭhāṅgulīnakhāḥ | pṛṣṭhaṃ gulphadvayaṃ pārṣṇī jaṅghā romāṇi jānunī || ūrū kaṭinitambasphigyugmaṃ jaghanavastike | nābhiḥ kukṣidvayaṃ pārśvodaramadhyavalitrayam || romālī hṛdayaṃ vakṣo vakṣojadvayacūcukam | jatruskandhāṃsakakṣādormaṇibandhakaradvayam || pāṇipṛṣṭhaṃ pādatalaṃ rekhāṅguṣṭhāṅgulīnakhāḥ | pṛṣṭhaṃ kṛkāṭikā kaṇṭhacibukaṃ ca hanudvayam || kapolau vakramadharottaroṣṭhadvijajihvikāḥ | ghaṇṭikā tālu hasitaṃ nāsikā kṣutamakṣiṇī || pakṣmabhrūkarṇabhālāni maulisīmantamaulikāḥ | ṣaṣṭiḥ ṣaḍuttarā yoṣidaṅgalakṣaṇasaṃhatiḥ || iti | atra yadyapi skānde kāśīkhaṇḍe pādalakṣaṇaṃ pṛthak noktam | tathāpi garuḍapurāṇādiṣu pādalakṣaṇasya pṛthaguktatvāvucyate | bhaviṣyapurāṇe, pratiṣṭhitatalāḥ samyagraktāmbhojasamatviṣaḥ | tādṛśāścaraṇā dhanyā yoṣitāṃ bhogavarddhanāḥ || pratiṣṭhitatalāḥ samyak saṃlagnabhūbhāgapādādhastalāḥ | karālairatinirmāṃsai rūkṣairatha śirātataiḥ || dāridryaṃ durbhāgyatvaṃ ca prāpnuvanti na saṃśayaḥ || iti | karālo bhayaṅkaraḥ | garuḍapurāṇe, yasyāḥ snigdhau samau pādau tanutāmranakhau tathā | śliṣṭāṅgulī connatāgrau tāṃ prāpya nṛpatirbhavet || nigūḍhagulphopacitau padmakāntitalau śubhau | asvedanau mṛdutalau matsyāṅkuśayavāṅkitau || vajrābjahalacihnau ca dāsyāḥ pādau tato'nyathā | iti | halaṃ lāṅgalam | viṣṇudharmottare, samagrabhūspṛśau yasyāścaraṇau kamalopamau | iti | sā praśastetyanuṣaṅgaḥ | varāhasaṃhitāyām, snigdhonnatāgratanutāmranakhau kumāryāḥ pādau samopacitacārunigūḍhagulphau | śliṣṭāṅgulī kamalakāntitalau ca yasyāstāmudvahedyadi bhuvo'dhipatitvamicchet || matsyāṅkuśābjayavavajrahalāsicihnā— vasvedanau mṛdutalau caraṇau praśastau | iti | iti pādalakṣaṇam | atha pādatalalakṣaṇam | skānde kāśīkhaṇḍe, strīṇāṃ pādataṃlaṃ snigdhaṃ māṃsalaṃ mṛdulaṃ samam | asvedamuṣṇamaruṇaṃ bahubhogocitaṃ smṛtam || rūkṣaṃ vivarṇaṃ paruṣaṃ khaṇḍitaṃ pratibimbakam | śūrpākāraṃ viśuṣkaṃ ca duḥkhadaurbhāgyasūcakam || iti | sāmudratilake, asitaṃ daurbhāgyāya śvetaṃ duḥkhāya yoṣitām | śūrpākṛtibhiścaityaḥ kuṭilaiḥ syurdurbhāgāścaraṇatalaiḥ || iti | yoṣā strī | iti pādatalalakṣaṇam | atha pādarekhālakṣaṇam | jaganmohane samudraḥ, yasyāḥ pādatale rekhā tarjantyāṃ suprakāśate | bharttāraṃ labhate śīghraṃ priyā bhartuśca jāyate || cakraṃ padmaṃ dhvajaṃ chatraṃ svastikaṃ vardhamānakam | yāsāṃ pāde ca dṛśyante jñeyāstā rājayoṣitaḥ || padmaṃ mālāṅkuśaṃ chatraṃ nandyāvarttaḥ pradakṣiṇam | pāṇipādeṣu dṛśyante rājñīṃ vadanti tāṃ budhāḥ || iti | skānde kāśīkhaṇḍe, cakrasvastikaśaṅkhābjadhvajamīnātapatravat | yasyā pādatale rekhā sā bhavetkṣitipāṅganā