Viramitrodaya 1.p187

1.p187

viṣṇudharmottare, bhuvaṃ kaniṣṭhikā yasyā na spṛśet kathañcana | na tāṃ kurvīta bhāryārthe mṛtyuḥ sa kathito budhaiḥ || iti | garuḍapurāṇe, kaniṣṭhikā'nāmikā vā yasyā na spṛśate mahīm | aṅguṣṭhaṃ vā gatātītya tarjanī kulaṭā tu sā || iti | parāśaro'pyāha, ekāpi yasyā na mahīṃ saṃspṛśeccaraṇāṅguliḥ | talamadhyamatho yasyā adhamāṃ tāṃ vinirdiśet || pāde pradeśinī yasyā aṅguṣṭhaṃ samatikramet | duḥkhitāṃ durbhagāṃ caiva kanyāṃ tāṃ parivarjayet || pāde madhyamikā yasyāḥ kṣitiṃ na spṛśate yadi | na sā ramati kaumāre svacchandā'kāryakāriṇī || pāde anāmikā yasyāḥ kṣitiṃ na spṛśate yadi | na sā ramati kaumāre dvitīye supratiṣṭhitā || pāde kaniṣṭhikā yasyāḥ kṣitiṃ na spṛśate yadi | dvitīyaṃ puruṣaṃ hatvā tṛtīye supratiṣṭhitā || iti | jaganmohane samudraḥ, yasyā na spṛśate bhūmimaṅgulī ca kaniṣṭhikā | bharttāraṃ prathamaṃ hatvā dvitīyena saha sthitā || yasyā na spṛśate bhūmiṃ kaniṣṭhā viralā dvijāḥ | saṅgatabhrukuṭīgaṇḍā puṃścalī cāpyabhāginī || yasyā anāmikā hrasvā tāṃ vidyātkalahapriyām | aṅguṣṭhaṃ tu vyatikramya yasyāḥ pāde pradeśinī || kumārī kurute jāraṃ yauvanasyaiva kā kathā | iti | vivekavilāse, yatpādāṅgulirekāpi bhaveddhīnā kathañcana | yena kenāpi sā sārdhaṃ prāyaḥ kalahakāriṇī || iti | iti pādāṅgulīlakṣaṇam | atha nakhalakṣaṇam | gargasaṃhitāyām, kuśeśayāḥ padmapalāśavarṇā rūpyaprabhā vidrumasaṃnibhāśca | ślakṣṇāḥ sujātāśca bhavanti dhanyāḥ strīṇāṃ nakhāḥ padmamaṇiprabhāśca || iti