Viramitrodaya 1.p188

1.p188

bhaviṣye, subhagattvaṃ nakhaiḥ snigdhairātāmraiśca dhanāḍhyatā | putrāḥ syurunnatairebhiḥ susūkṣmaiścāpi rājatā || pāṇḍuraiḥ sphuṭitai rūkṣairnīlairdhūmraistathā kharaiḥ | niḥsvatā bhavati strīṇāṃ pītaiścābhakṣyabhakṣaṇam || iti | skānde kāśīkhaṇḍe, snigdhāḥ samunnatāstāmrā vṛttāḥ pādanakhāḥ śubhāḥ | iti | iti nakhalakṣaṇam | atha caraṇapṛṣṭhalakṣaṇam | skānde kāśīkhaṇḍe, rājñītvasūcakaṃ strīṇāṃ pādapṛṣṭhaṃ samunnatam | asvedamaśirāḍhyaṃ ca masṛṇaṃ mṛdu māṃsalam || dāridryaṃ madhyanimnena śirālena sadādhvagā | romāḍhyena bhaveddāsī nirmāṃsena ca durbhagā || iti | iti caraṇapṛṣṭhalakṣaṇam | atha gulphalakṣaṇam | bhaviṣye, gulphāḥ snigdhāśca vṛttāśvāsamārūḍhaśirāstathā | yasyāḥ sā tu dhanāḍhyatvaṃ bāndhavādyaiḥ samāpnuyāt || iti | skānde kāśīkhaṇḍe, gūḍhagulphau śubhāyoktāvaśirālau suvartulau | viṣamau śithilau rūkṣau syātāṃ daurbhāgyasūcakau || iti | jaganmohane samudraḥ, gulphaiśca mahiṣākārairbandhanaṃ vadhamāpnuyāt | nigūḍhagulphā yā nārī sā'tyantaṃ sukhamedhate || iti | gargaḥ, atyunnatābhyantarataḥ śirālā gulphā viśālāśca bhavanti yāsām | prajā na vindanti dhanaṃ na cāryāstā gulphadoṣairvidhavā bhavanti || iti gulphalakṣaṇam | atha pāṣṇiṃlakṣaṇam | skānde kāśīkhaṇḍe, samapāṇiḥ śubhā nārī pṛthupāṇiśca durbhagā | kulaṭonnatapāṇiḥ syāddīrghapāṇiśca duḥkhabhāk || iti | jaganmohane samudraḥ, unnatapāṇirduḥśīlā mahāpāṇistu bandhakī | dīrghapāṇiḥ parikleśā samapāṇistu śobhanā || iti | bandhakī vyabhicāriṇī | vivekavilāse, kṛpaṇā syānmahāpāṣṇirdīrghapāṣṇistu kopanā | duḥśīlonnatapāṣṇiśca nindyā viṣamapāṣṇikā || iti | iti pāṣṇilakṣaṇam | atha jaṅghālakṣaṇam | garuḍapurāṇe, jaṅghe ca romarahite suvṛtte viśire śubhe || iti | viśire śirāvarjite | bhaviṣye, aśirāḥ śarakāṇḍābhāḥ suvṛttālpatanūruhāḥ | jaṅghāḥ kurvanti saubhāgyaṃ yānaṃ ca gajavājibhiḥ || kliśyate romajaṅghā strī bhramatyudvaddhapiṇḍikā | kākajaṅghā patiṃ hanti vācāṭā kapilā ca yā || iti | vācāṭā bahupalapanaśīlā | skānde kāśīkhaṇḍe, romahīne same snigdhe yajjaṅge kramavartule | sā rājapatnī bhavati viśire sumanohare || iti | sāmudratilake, śuṣke pṛthū viśāle śirānvite sthūlapiṇḍike yasyāḥ | jaṅghe māṃsopacite ślathamūle pāṃsulā sā syāt || iti | iti jaṅghālakṣaṇam | atha romalakṣaṇam | bhaviṣye, atyantaṃ kuṭilai rūkṣaiḥ sphuṭitāgrairguḍaprabhaiḥ | anekajaistathā romaiḥ keśaiścāpi tathāvidhaiḥ || atyantaṃ piṅgalā nārī viṣakanyeti niścitā | saptāhābhyantare pāpā patiṃ hanyānna saṃśayaḥ || iti | skānde kāśīkhaṇḍe, ekaromā rājapatnī dviromāpi sukhāspadā | triromā romakūpeṣu bhavedvaidhavyaduḥkhabhāk || iti | iti romalakṣaṇam | atha jānulakṣaṇam | garuḍapurāṇe, anulbaṇaṃ sandhideśe samaṃ jānudvayaṃ śubham | iti | bhaviṣye, jānubhiścaiva mārjārāsiṃhajānvanukāribhiḥ | śriyamāpya subhāgyatvaṃ prāpnuvanti sutāṃstathā || ghaṭābhairadhvagā nāryo nirmaॉsaiḥ kulaṭāḥ striyaḥ | śirālairapi hiṃsāraḥ syurviśiṣṭairdhanavarjitāḥ || iti | skānde kāśīkhaṇḍe, vṛttaṃ piśitasaṃlagnaṃ jānuyugmaṃ praśasyate | nirmāṃsaṃ svairacāriṇyā daridrāyāśca viślatham || iti | utpale samudraḥ, suśliṣṭe jānunī dhanye śirāromavivarjite | iti | iti jānulakṣaṇam | athorulakṣaṇam | bhaviṣye, hastihastanibhairvṛttai rambhābhaiḥ karabhopamaiḥ | prāpnuvantyūrubhiḥ śaśvat striyaḥ sukhamanaṅgajam