Viramitrodaya 1.p189

1.p189

daurbhāgyaṃ sthūlamāṃsābhirbandhanaṃ romaśorubhiḥ | tanubhirvadhamityāhurmadhyacchidraistvanīśatā || iti | garuḍapurāṇe, ūrū karikarākārau pīvarau ca samau śubhau | iti | skānde kāśīkhaṇḍe, viśiraiḥ karabhākārairūrubhirmasṛṇairdhanaiḥ | suvṛttai romarahitairbhaveyurbhūpavallabhāḥ || vaidhavyaṃ romaśairūktaṃ daurbhāgyaṃ cipiṭairapi | madhyacchidrairmahāduḥkhaṃ dāridryaṃ kaṭhinatvacaiḥ || iti | ityūrulakṣaṇam | atha kaṭilakṣaṇam | skānde kāśīkhaṇḍe, caturbhiraṅgulaiḥ śastā kaṭirviṃśatisaṃyutaiḥ | samunnatanitambāḍhyā caturasrā mṛgīdṛśām || vinatā cipiṭā dīrghā nirmāṃsā saṅkaṭā kaṭiḥ | hrasvā romayutā nāryā duḥkhavaidhavyasūcikā || iti | iti kaṭilakṣaṇam | atha nitambalakṣaṇam | skānde kāśīkhaṇḍe, nitambabimbo nārīṇāmunnato māṃsalaḥ pṛthuḥ | mahābhogāya samproktastadanyo'śarmaṇe mataḥ || iti | sāmudratilake, vikaṭo cipiṭo natimān nirmāṃso romaśaḥ kharaḥ śuṣkaḥ kurute nitambaphalako daridratāṃ duḥkhadaurbhāgyam || iti | iti nitambalakṣaṇam | atha sphigalakṣaṇam | skānde kāśīkhaṇḍe, kapitthaphalavadvṛttau mṛdulau māṃsalau ghanau | sphicau balivinirmuktau ratisaukhyavivarddhanau || iti | bhaviṣye, kapitthaphalasaṅkāśaḥ pīno balivivarjitaḥ | sphik praśasto hi nārīṇāṃ nindito'hyanyathā dvija || iti | iti sphigalakṣaṇam | atha bhagalakṣaṇam | bhaviṣye, ūrdhvaroma bhagaṃ yasyāḥ samaṃ suśliṣṭasaṃsthitam | api nīcakulotpannā rājapatnī bhavatyasau || aśvatthapatrasadṛśaḥ kūrmapṛṣṭho'pyacūlikaḥ