Viramitrodaya 1.p193

1.p193

vaṃśavetasapatrābho gajaromoccanāsikaḥ | vikaṭaḥ kuṭilākāro lambagalaḥ ślatho'śubhaḥ || iti | viṣṇudharmottare, guhyaṃ pradakṣiṇāvarttamaśvatthadalasannibham | iti | jaganmohane samudraḥ, āvarttastu bhavedyasyā bhagasyoparimastake | sā caiva vardhate putrairdhanadhānyaiḥ samanvitā || aśvatthapatrasaṅkāśaṃ guhyaṃ yasyāḥ prajāyate | sā bhavetsubhagā nārī yadi gūḍho maṇirbhavet || kūrmapṛṣṭho gajaskandhaḥ samaromālpanāsikaḥ | vistīrṇaḥ padmavarṇaśca ṣaḍete subhagā bhagāḥ || kaṭhoraḥ khararomā ca śuṣkaśca dīrghanāsikaḥ | saṅkaṭo viralaścaiva ṣaḍete durbhagā bhagāḥ || iti | sāmudratilake, śuciratyuṣṇaḥ sughano gojihvākarkaśo'tha vā mṛdulaḥ | atisaṃvṛtaḥ sugandhiḥ saptabhagā varddhayanti ratim || iti | iti bhagalakṣaṇam | atha jaghanalakṣaṇam | bhaviṣye, savyāvarttaṃ samaṃ cāru sūkṣmaromacitaṃ pṛthu | jaghanaṃ śasyate strīṇāṃ ratisaukhyakaraṃ dvijāḥ || iti | skānde kāśīkhaṇḍe, bhagasya bhālaṃ jaghanaṃ vistīrṇaṃ tuṅgamāṃsalam | mṛdulaṃ mṛduromāḍhyaṃ dakṣiṇāvarttamīḍitam || vāmāvarttaṃ ca nirmāṃsaṃ bhugnaṃ vaidhavyasūcakam | saṅkaṭaṃ sthapuṭaṃ rūkṣaṃ jaghanaṃ duḥkhadaṃ sadā || iti | utpale samudraḥ, jaghanaṃ vipulaṃ yasyāḥ susparśaṃ romavarjitam | suvarṇābharaṇairyuktā rājapatnī bhavatyasau || iti | iti jaghanalakṣaṇam | atha vastilakṣaṇam | skānde kāśīkhaṇḍe, vastiḥ praśastā vipulā mṛdvī stokasamunnatā | romaśā ca śirālā ca rekhāṅkā naiva śobhanā || iti | stokasamunnatā īṣaduccā | iti vastilakṣaṇam | atha nābhilakṣaṇam | garuḍapurāṇe, vistīrṇamāṃsopacitā gambhīrā vipulā śubhā || nābhiḥ pradakṣiṇāvarttā-iti | skānde kāśīkhaṇḍe, gambhīrā dakṣiṇāvarttā nābhiḥ syātsukhasampade | vāmāvarttā samuttānā vyaktagranthirna śobhanā || iti | gargaḥ, saṃchannanābhyastvavivarṇanābhyaḥ pradakṣiṇāvarttavivṛttanābhyaḥ | striyaḥ praśaṃsanti viśālanābhyaḥ padmāyatābhiśca sumaṇḍalābhiḥ || iti | nābhibhiriti, śeṣaḥ | jaganmohane samudraḥ, gambhīranābhī yā nārī sā bhavetpuruṣapriyā | padmākārā bhavennābhirnūnaṃ sā sukhamedhate || iti | iti nābhilakṣaṇam | atha kukṣilakṣaṇam | bhaviṣye, vipulaiḥ sukumāraiśca kukṣibhiḥ subahuprajāḥ | maṇḍūkakukṣiryā nārī rājānaṃ sā prasūyate || iti | skānde kāśīkhaṇḍe, sūte sutān bahūnnārī pṛthukukṣiḥ sukhāspadam | kṣitīśaṃ janayetputraṃ maṇḍūkābhena kukṣiṇā || unnatena balībhājā sāvatte̍nāpi kukṣiṇā | vandhyā prabrajitā dāsī kramādyoṣā bhavediha || iti | iti kukṣilakṣaṇam | atha pārśvalakṣaṇam | skānde kāśīkhaṇḍe, samaiḥ samāṃsairmṛdubhiryoṣinmagnāsthibhiḥ śubhaiḥ | pārśvaiḥ saubhāgyasukhayornidhānaṃ syādasaṃśayam || yasyā dṛśyaśire pārśve unnate romasayute | nirapatyā ca duḥśīlā sā bhavet duḥkhaśevadhiḥ || iti