Viramitrodaya 1.p195

1.p195

nirmāṃsena tu vaidhavyaṃ vistīrṇena kalipriyā || iti | vistīrṇaṃ parimāṇādhikam | tatparimāṇaṃ coktam— skānde kāśīkhaṇḍe, aṣṭādaśāṅgulatatamuraḥ pīvaramunnatam | sukhāya duḥkhāya bhavedromaśaṃ viṣamaṃ pṛthu || iti | varāhaḥ, romapravarjitamuro mṛdu cāṅganānām—iti | mṛdu nātimṛdu | sāmudratilake, pīvaramunnatamāyatamuraḥsthalaṃ na mṛdu na kaṭhinaṃ viśiram | aṣṭādaśāṅgulatataṃ romavihīnaṃ śubhaṃ strīṇām || iti | iti vakṣolakṣaṇam | atha stanalakṣaṇam | bhaviṣyapurāṇe, suvṛttamunnataṃ pīnamadūronnatamāyatam | stanayugmaṃ sadā śastamato'nyadasukhāvaham || unnatiḥ prathame garbhe dvayorekasya bhūyasī | vāme tu jāyate kanyā dakṣiṇe tu bhavetsutaḥ || stanaiḥ sarpaphaṇākāraiḥ śvajihvākṛtibhistathā | dāridryamabhigacchanti striyaḥ puruṣaceṣṭitāḥ || iti | skānde kāśīkhaṇḍe, ghanau vṛttau dṛḍhau pīnau samau śastau payodharau | sthūlāgrau viralau śuṣkau vāmorūṇāṃ na śarmadau || dakṣiṇonnatavakṣojā putriṇīṣvagraṇīrmatā | vāmonnatakucā sūte kanyāṃ saubhāgyasundarīm || avaghaṭṭaghaṭītulyau kucau dauḥśīlyasūcakau | pīvarāsyau sāntarālau pṛthū pīnau na śobhanau || mūle sthūlau kramakṛśāvagre tīkṣṇau payodharau | sukhadau pūrvakāle tu paścādatyantaduḥkhadau || iti | garuḍapurāṇe, aromaśau stanau pīnau ghanāvaviṣamau śubhau | iti | garge'pi, snigdhāḥ samāścāpi bhavanti yāsāmuccāśca māṃsopacitāśca vāhyāḥ | raktāgratuṇḍāḥ parimaṇḍalāśca strīṇāṃ stanāḥ piṇḍitavacca dhanyāḥ || iti