Viramitrodaya 1.p325

1.p325

navāṣṭadaśasaṅkhyairvā tīkṣṇāgrairdaśanaiḥ śubhaiḥ | mallikābhaiśca muktābhairgṛhe'pi dhanadhānyadaḥ || varṇatastāmrakapilo brāhmaṇasya praśasyate | śveto raktaśca kṛṣṇaśca gauraḥ pāṭala eva ca || bhadranāsaḥ supṛṣṭhaśca śabalaḥ pañcavarṇakaḥ | pṛthukarṇo mahāskandhaḥ ślakṣṇaromā ca yo bhavet || raktaśca kapilo yaśca raktaśṛṅgaśapho bhavet | śvetodaraḥ kṛṣṇapṛṣṭho brāhmaṇasya praśasyate || anuraktena varṇena kṣatriyasya praśasyate | kāñcanābhena vaiśyasya kṛṣṇenāpyantajanmanaḥ || yasya karṇāyate śṛṅge sumukhābhimukhe sadā | sarveṣāmeva varṇānāṃ sa tu sarvārthasādhakaḥ || mārjārapādaḥ kapilo dhanyaḥ kāpilapiṅgalaḥ | śveto mārjārapādastu dhanyo maṇinibhekṣaṇaḥ || karaṭaḥ piṅgalaścaiva śvetapādastathaiva ca | sarvapādasito yaśca dvipādaśveta eva ca || kapiñjalanibho dhanyastathā tittirisannibhaḥ | ākarṇamūlācchvetaṃ ca mukhaṃ yasya prakāśate || nadīmukha iti jñeyo raktavarṇo viśeṣataḥ | śvetaṃ ca jaṭharaṃ yasya bhavetpṛṣṭhaṃ ca gopateḥ | vṛṣabhaḥ sa samudrākhyaḥ satataṃ kulavarddhanaḥ || mallikāpuṣpacitraśca dhanyo bhavati puṅgavaḥ | kamalairmaṇḍalaiścāpi citro bhavati bhogadaḥ || atasīpuṣpavarṇaśca tathā dhanyataraḥ smṛtaḥ | ete dhanyāstathā'dhanyān kīrttayiṣyāmi te nṛpa