Viramitrodaya 10.p76

10.p76

liṅgapurāṇe, bahunātra kimuktena carācaramidaṃ jagat | śivaliṅgaṃ samabhyarcya sthitamatra na saṃśayaḥ || mūle brahmā tathā madhye viṣṇustribhuvaneśvaraḥ | rudropari mahādevaḥ praṇavākhyaḥ sadāśivaḥ || liṅgavedī mahādevī liṅgaṃ sākṣānmaheśvaraḥ | tayoḥ sampūjanānnūnaṃ devī devaśca pūjitau || darśanātsparśanāttasya labhante nirvṛtiṃ narāḥ | tasya puṇyaṃ mayā vaktuṃ samyagyugaśatairapi || śakyate naiva viprendra tasmātsaṃsthāpayecchivam | sarveṣāmeva varṇānāṃ vibhordivyaṃ vapuḥ śubham || sakalaṃ bhāvanāyogyaṃ yogināmeva niṣkalam | tathā, śivaliṅgaṃ samutsṛjya yajate cānyadevatāḥ | sa nṛpaḥ saha deśena rauravaṃ narakaṃ vrajet || brahmādayaḥ surāḥ sarve rājānaśca maharddhikāḥ | mānavā munayaścaiva sarve liṅgaṃ yajanti ca || viṣṇunā rāvaṇaṃ hatvā sasainyaṃ brahmaṇaḥ sutam | sthāpitaṃ vidhivadbhaktyā liṅgaṃ tīre nadīpateḥ || kṛtvā pāpasahasrāṇi hatvā vipraśataṃ tathā | bhāvātsamāśrito liṅgaṃ mucyate nātra saṃśayaḥ || tasmādabhyarcayelliṅgaṃ yadīcchecchāśvataṃ padam || sarvaṃ liṅgamayā lokāḥ sarvaṃ liṅge pratiṣṭhitam | tasmātsarvaprayatnena sthāpayetpūjayecca tat || brahmā haraśca bhagavān viśvedevā umā hariḥ || lakṣmīrdhṛtiḥ smṛtiḥ prajñā medhā durgā śacī tathā | rudrāśca vasavaḥ skando viśākhaḥ śākha eva ca || naigameśaśca bhagavān lokapālā grahāstathā | sarve nandipurogāśca gaṇā gaṇapatiḥ prabhuḥ || pitaro munayaḥ sarve kuberādyāśca suprabhāḥ | ādityā vasavaḥ sādhyā aśvinau ca bhiṣagvarau || viśvedevāḥ samarutaḥ paśavaḥ pakṣiṇo mṛgāḥ | brahmādisthāvarāntaṃ ca sarvaṃ liṅge pratiṣṭhitam || tasmātsarvaṃ parityajya sthāpayelliṅgameśvaram | yatnena sthāpitaṃ piṇḍaṃ pūjitaṃ pūjayedyadi || mūle brahmā vasati bhagavān madhyabhāge ca viṣṇuḥ sarveeśānaḥ paśupatirajo rudramūrtirvareṇyaḥ | tasmālliṅgaṃ gurugurutaraṃ sthāpayetpūjayedvā yasmātpūjyo gaṇapatirasau devamukhyaiḥ samastaiḥ || gandhaiḥ sragdhūpadīpasnapanahutabalistotramantropahārairnityaṃ ye'bhyarcayanti tridaśavaratanuṃ liṅgamūrtiṃ maheśam | garbhādhānārthanāśakṣayabhayarahitā devagandharvamukhyaiḥ siddhairvidyāśca pūjyā gaṇavaranamitāste bhavantyaprameyāḥ || tasmādbhaktyopacāreṇa sthāpayetparameśvaram | pūjayecca viśeṣeṇa liṅgaṃ sarvārthasiddhaye || tathā, tasmātsadā pūjanīyo liṅgamūrtirmaheśvaraḥ | yāvatpūjā sureśasya tāvaddehasthitiryaśaḥ || pūjanīyaḥ śivo nityamataḥ śraddhāsamanvitaiḥ | sarvo liṅgamayo lokaḥ sarvaṃ liṅge pratiṣṭhitam || tasmātsampūjayelliṅgaṃ ya icchetsiddhimātmanaḥ | sarve liṅgārcanāṃdeva devā daityāśca dānavāḥ || yakṣā vidyādharāḥ siddhā rākṣasāḥ piśitāśinaḥ | pitaro munayaścāpi piśācāḥ kinnarādayaḥ || arcayitvā liṅgamūrtiṃ saṃsiddhā nātra saṃśayaḥ | tasmālliṅgaṃ yajinnityaṃ yena kenāpi bho surāḥ || tathā, ye vāñchanti mahābhogān rājyaṃ vā tridaśālaye | te'rcayantu sadā kālaṃ liṅgarūpaṃ maheśvaram || chittvā bhittvā ca bhūtāni hatvā sarvamidaṃ jagat | yajedekaṃ virūpākṣaṃ na sa pāpaiḥ pralipyate || iti | iti liṅgamahimā | atha liṅgalakṣaṇam | tatra liṅgaṃ dvividham akṛtrimaṃ kṛtrimaṃ ca | akṛtrimaṃ svayambhūbāṇaliṅgādi | kṛtrimaṃ nirmitadhātuliṅgādi | siddhāntaśekhare, natvā nādamayaṃ liṅgaṃ piṇḍikāṃ bindurūpiṇīm | brāhmīṃ śilāṃ kalārūpāṃ vakṣye liṅgasya lakṣaṇam || talliṅgaṃ dvividhaṃ jñeyamacalaṃ ca calaṃ tathā | pratyekaṃ trividhaṃ jñeyaṃ vyaktāvyaktobhayātmakam || prāsāde sthāpitaṃ liṅgamacalaṃ tacchilādijam | sthāpitaṃ taccalaṃ geheṃ sthiraṃ liṅgamathocyate