Viramitrodaya 10.p75

10.p75

tatra— viśeṣācchailajaṃ muktyai bhuktaye cānuṣaṅgataḥ | pārthivaṃ bhuktaye śastaṃ muktaye cānuṣaṅgataḥ || evaṃ vai dārujaṃ jñeyaṃ citraliṅgaṃ tathā punaḥ | sthiralakṣmīpradaṃ haimaṃ rājataṃ caiva rājyabhṛt || prajāvṛddhikaraṃ tāmraṃ vāṅgmayāyuḥpravarddhanam | padmarāgaṃ mahābhūtayai saubhāgyaya ca mauktikam || cāndrakāntaṃ mṛtyujitaṃ sphāṭikaṃ sarvakāmadam | ityādivacanaiḥ phalaviśeṣakāmanayā nānāvidhaliṅgapūjā uktā | sā ca pūjā— liṅgaṃ salakṣaṇaṃ kuryāttyajelliṅgamalakṣaṇam | dairghyahīne bhavedvyādhiradhike śatruvarddhanam || nāhahīne vināśaḥ syādadhike ca śiśukṣayaḥ | vistāre cādhike hīne rāṣṭranāśo bhaveddhruvam || śūlahīne tu dāridryaṃ śirohīne kulakṣayaḥ | brahmasūtravihīne ca rājā rāṣṭraṃ ca naśyati || tasmātsarvaprayatnena liṅgaṃ kuryātsalakṣaṇam | liṅgaṃ salakṣaṇaṃ pūjyaṃ tyajelliṅgamalakṣaṇam || ityādivacanaiḥ saṃlakṣaṇānāmeva liṅgānāṃ kartavyetyuktam | tatra kāni salakṣaṇāni liṅgānīti liṅgalakṣaṇamucyate | tatrādau liṅgamahimā ucyate— skandapurāṇe, śiva uvāca | na tuṣyāmyarcito'rcāyāṃ puṣpadhūpanivedanaiḥ | liṅge'rcite yathātyarthaṃ parituṣyāmi pārvati || eṣa devi purākalpe līno'haṃ sarvadaivataiḥ | līnatvālliṅgamṛtyuktaṃ sadevāsurakinnaraiḥ || sarvendriyaprayukto vā saṃyuktaḥ sarvapātakaiḥ | prayacchāmi divaṃ devi yo me liṅgārcane rataḥ || tyaktvā sarvāṇi pāpāni nirdvandvo dagdhakalmaṣaḥ | manmanā mannamaskāro māmeva pratipadyate || vastrapūtajalairliṅgaṃ snāpayitvā mamāmarāḥ | lakṣāivamedhajanitaṃ puṇyamāpnoti sattamāḥ || sugandhacandanarasairliṅgamālipya bhaktitaḥ | ālipyate surastrībhiḥ sugandhairyakṣakaddamaiḥ || iti | śivanāradasamvāde'pi, vinā liṅgārcanaṃ yasya kālo gacchati nityaśaḥ | mahāhānirbhavettasya durvṛttasya durātmanaḥ || ekataḥ sarvadānāni vratāni vividhāni ca | tīrthāni niyamā yajñā liṅgārcā caikataḥ sthitā || kalau liṅgārcanaṃ śreṣṭhaṃ yathā loke pradṛśyate | tathā nāstīti nāstīti śāstrāṇāmeṣa niścayaḥ || bhuktimuktipradaṃ liṅgaṃ vividhāpattivāraṇam | pūjayitvā naro nityaṃ śivasāyujyamāpnuyāt || na liṅgārādhanādanyatpuṇyaṃ vedacaturṣvapi | vidyate sarvaśāstrāṇāmeṣa eva viniścayaḥ || sarvamanyatparityajya karmajālamaśeṣataḥ | bhaktyā paramayā vidvān liṅgamekaṃ prapūjayet || brāhmaṇaḥ kṣatriyo vaiśyaḥ śūdro vāpyanulomajaḥ | pūjayetsatataṃ liṅgaṃ tattanmantreṇa sādaram