Viramitrodaya 7.p50

7.p50

dvātriṃśatsaṅkhyamātrābhiryo yāti dhanuṣāṃ śatam | sa uttamagatirnāgo gatijñaiḥ pariniṣṭhitaḥ || mātrāpañcāśatā madhyo hīno'śītyā ca gacchati | iti | iti vegalakṣaṇam | atha śabdalakṣaṇam | bārhaspatyasaṃhitāyām, sthānānyaṣṭau nṛpate bhavanti śabdasya vāraṇendrāṇām | tālvoṣṭhaśirauraḥkarajihvamūlaṃ galakapolau ca || gambhīrasaumyadṛṣṭāḥ svasthāśca garjitāstathā snigdhāḥ | nādāḥ śubhā narādhipa ṣaḍeva kathitā gajendrāṇām || catvārastvaśubhāste raudrāḥ kṣayabhayaśokasaṅgramotpannāḥ | evaṃ śubhāśubhamatā daśaprakārāḥ svarā jñeyāḥ || anye'pi vakrakarṇagatānilāsphālanodbhavrā bahavaḥ | śabdā bhavanti kāriṇāṃ śubhāśubhaṃ tairna sambhavati || niḥśvasitacuñcukā yitarūkṣitakūjitakharoṣṭranādanibhāḥ | vāyasajambukakapikāṣṭhabhaṅgasadṛśā ravāstvaśubhāḥ || jñeyāni śubhāni sadā mṛdaṅgajīmūtadundubhinibhāni | potāyitaphenāyitagarjitahasitāni nāgānām || potāyitaṃ ca tālavoṣṭhasambhavaṃ garjitaṃ ca kaṇṭhena | jihvāmūlasamutthaṃ phenāyitamityabhirukhyātam || hasitaṃ kapolajanitaṃ puṣkaravivarodbhavaṃ ca nāgānām | bhavati dhanadhānyavāhanabhūlābhakaraṃ narendrasya || hastena mṛdaṅgaravaṃ karṇābhyāṃ dundubhiniḥsvanaṃ caiva | darduraravaṃ galena ca karoti yo jayakaraḥ sa gajaḥ || sarvasthānasamutthāḥ śabdā naranātha vāraṇandrāṇām | ācāryaiḥ sarvaiste bṛṃhitasaṃjñāḥ śubhāstu vijñeyāḥ || ete ca jayaparājayakathanasamarthā bhavanti bhūpānām | garhitaśubhapradeśasthā noparivarddhitā nādāḥ || śuṣkatṛṇakāṣṭhakaṇṭakavalmīkāsthiśmaśānaduṣṭāsu | pāṣāṇāṅgārādiṣu bhūmiṣu yadi saṃsthitāḥ kariṇaḥ || bṛṃhanti hīnalakṣaṇamasakṛdbhartustadā jayo nāsti | jayadāstu śārdūlādiśarabhoddeśasthitā nityam || spṛśati karāgreṇaṃ yadā narādhipasya vijayastadā rājan | senāmadhye ca yadā bṛṃhati śārdūlavadgajo hṛṣṭaḥ || bhavati svasainyasya tadā vijayaḥ saṅkhye narendrasya