Viramitrodaya 7.p52

7.p52

stanāntare śiromadhye kumbhāntaracūlikāntare | vakṣasyāvarttayogena kuñjaraḥ pañcamaṅgalaḥ || cūlikā karṇapippalyuparitano bhāgaḥ | śīrṣāvartto'bhiṣekāya stanāvartto jayāya ca | sukhāya cūlikāvarttaḥ kumbho rājñaḥ priyāya ca || vaṃśe prothe ca vāhitthe manyāyāṃ sagade kaṭe | karṇe 'kṣikūṭe nābhau ca kakṣapārśvāṃsakukṣiṣu || bāladhau pecake meḍhre randhrasandhiphalāsu ca | -āvarttā na praśasyante karṇabhāgeṣu teṣu ca || iti | vaṃśaḥ śuṇḍādaṇḍavaṃśaḥ, na pṛṣṭhavaṃśaḥ| sandhirniryāṇasamīpapradeśaḥ| ityāvarttalakṣaṇam | atha puṣpalakṣaṇam | hṛdayaprabandhe, svastikādiṣu saṃsthānaṃ puṣpaṃ daśanadehajam | snigdhaṃ bhavyaṃ śubhacchāyamacchinnaṃ vāñchitapradam || kabandhādikasaṃsthānaṃ vigataprabhamasphuṭam | rūkṣavarṇaṃ ca kusumaṃ tato'narthakaraṃ matam || dadyātsutaṃ sitaṃ puṣpaṃ snigdhaṃ pītaṃ ca hemadam | nīlotpalendranīlābhaṃ snigdhaṃ kālaṃ ca vṛttidam || yacca syātpūjite bhāge kusumaṃ snigdhapāṇḍuram | śubhāya ca śubhākāraṃ tadbhavedbhūpateḥ śubham || śakracāpanibhaṃ puṣpaṃ dantopari ca dantinaḥ | diśeddṛṣṭiṃ subhikṣaṃ ca kṣemaṃ ca kṣitirakṣiṇaḥ || śvetāntaḥ snigdharakte ca puṣpe raṇasaho bhavet | puṣpe śvetāntaḥkāle ca dānavṛddhiṃ vinirdiśet || śrīvṛkṣādinibhākārairvaijayantīdhvajopamaiḥ