Viramitrodaya 9.p85

9.p85

nānāvṛddhikaraṃ caiva tadanādyaṃ trayaṃ bhavet | cakramadhye tu dṛśyeta paraśurāmasya rūpakam || tattannāmāṅkitaṃ cakraṃ jāmadagnyaṃ prakīrttitam | iti | iti śālagrāmacakralakṣaṇam | atha śālagrāmamudrālakṣaṇam | vaikhānasasaṃhitāyām, brahmovāca | bhagavandevadeveśa śaṅkhacakragadādhara | saṃśayaṃ me samudbhūtaṃ chettumarhasi vai vibho || śālagrāmasya yatpuṇyaṃ kṣetraṃ trailokyaviśrutam | tatra tiṣṭheddhariḥ sākṣātsarvadevaiḥ samanvitaḥ || tatrotpannāḥ śilā viṣṇoḥ sūkṣmāḥ sūkṣmatarastathā | prādurbhāvaiśca vividhairākāraiśca samanvitāḥ || āyurdāḥ kāmadāḥ proktā bhogamokṣapradāstathā | śastā aśastāśca tathā etadākhyātumarhasi || śrībhagavānuvāca | śṛṇu brahman pravakṣyāmi śālagrāmāgirirhariḥ | yasmāddhariḥ sthitastatra prādurbhāvairanekaṃśaḥ || lakṣaṇairvividhākārairlāñchitaṃ caiva dṛśyate | śailaṃ sūkṣmamasakṣmaṃ vā mudraikā parikīrttitā || ekapadmāṅkitā yā tu dakṣiṇāvarttasaṃsthitā | caturlāñchanasaṃyuktā bhogamokṣapradā śubhā || padme yasyāṃ saṃsthite dve nābhyāṃ ca saṃvṛte sthite | kenāpi lāñchanenaiva caturvargaphalapradā || cakreṇa kambunā yā ca padmena gadayāṅkitā | tatra śrīḥ pratyahaṃ tiṣṭhetsadā sampadamādiśet