Viramitrodaya 9.p86

9.p86

lāñchanena vinā yā syādapraśastā tu sā smṛtā | cakraṃ vā kevalaṃ yatra padmaṃ vā atha vā gadā || lāñchanaṃ vanamālā ca harilakṣmyā saha sthitaḥ | tasmin gehe na dāridryaṃ na śoko noragādbhayam || na caurāgnibhayaṃ tatra grahairduṣṭairna bādhyate | ante mokṣo bhavettasya pūjanādeva nityaśaḥ || kevalaṃ padmasaṃyuktā yā sā vaikuṇṭha ucyate | ghoṇākṛtirvarāhākhyā caturlāñchanasaṃyutā || cakreṇa dṛśyate liṅgaṃ tadā tatra suśobhanam | vārāhamūrttisaṃyuktā sarvakāmaphalapradā || dadyātsā mokṣasaṃsiddhiṃ brahmacaryeṇa pūjitā | vanamālā tu vai yasyāmakṣasūtraṃ kamaṇḍaluḥ || kapilākhyā bhavenmudrā dhanaiśvaryapradāyikā | koṭharāsyā suvikṛtā nṛsiṃhamukhalāñchanā || pāśāṅkuśagadācakrāṇyeṣāmekena lāñchitā | nārsiṃhī bhavenmudrā bhogamokṣapradāyikā || darśanānnaśyate pāpaṃ brahmahatyāṃ vyapohati | sānnidhyānmantrapūrveṇa pūjanena phalādhikā || śūlacinhāṅkitā yā ca kalaśena samanvitā