Viramitrodaya 9.p87

9.p87

vainateyā sadā tatra kena cillakṣaṇānvitā || sā jayākhyā parā mudrā caturvargaphalapradā | mīnādikūrmasaṃyuktā sarvakāmārthasaṃyutā || padmāsanasthā yā mudrā sarvakāmaśubhapradā | ekaikenaiva cinhena lāñchitā tena śasyate || aśvākṛtistathā mudrā sākṣamālā sapustakā | padmāṅkitā bhavenmudrā hayagrīvetiviśrutā || bhayaduḥkhāśubhaistyakto naraḥ pāpātpramucyate | akṣayā ca bhavettasya lakṣmī raiśvaryamuttamam || prāguktalāñchanāḥ sarve yasyāmekatra saṃsthitāḥ | sarvatra sarvadā pūjyā mucyate sarvabandhanaiḥ || iti | purāṇasaṅgrahe, matsyākhyā kūrmasaṃyuktā kūrmākhyā matsyasaṃyutā | padmāsanasthā sā mudrā arthakāmaphalapradā || tato'nyā mūrttiranyonyalāñchitā naiva śasyate | ghoṇārūpā varāhākhyā caturlāñchanasaṃyutā || dadyātsā mokṣasaṃsiddhiṃ brahmacaryeṇa pūjitā | netre sammīlite yasyāmakṣasūtraṃ kamaṇḍaluḥ || kapilākhyā bhavenmudrā dhyānaiśvaryapradāyikā | sthūlacinhaṃ mukhaṃ yasyāḥ kalaśena samāyutam || vainateyā bhavenmudrā lāñchanaiśca sulakṣitā | pūjitā sā bhavennūnaṃ bhuktimuktiphalapradā || iti | prayogapārijāte'pi kiñcitsmaryate | pāñcajanyāṅkitā yā tu padmena gadayā yutā | tatra śrīḥ pratyahaṃ tiṣṭhetsadā sampadamādiśet || pāñcajanyaḥ śaṅkhaḥ | jayākhyā paramā mudrā caturvargaphalapradā | yeṣāṃ caikena cinhena lāñchitā caiva dṛśyate || iti | iti śālagrāmamudrālakṣaṇam | atha kṣetralakṣaṇam | brahmāṇḍapurāṇe, kapilaṃ nārasiṃhaṃ tu vāmanaṃ tvasitaprabham | dāmodaraṃ tu nīlābhamaniruddhaṃ tathaiva ca || śyāmaṃ nārāyaṇaṃ kṣetraṃ kṛṣṇavarṇaṃ tu vaiṣṇavam | bahuvarṇamanantaṃ ca śrīdharaṃ pītamucyate || nṛsiṃhapurāṇe'pi, vāsudevaṃ sitaṃ jñeyaṃ raktaṃ saṅkarṣaṇaṃ tathā | dāmodaraṃ tu nīlābhamaniruddhaṃ tathaiva ca || śyāmaṃ nārāyaṇaṃ kṣetramevaṃ ca munipuṅgava | iti nāradaṃ prati brahmaṇo vacanāt | purāṇasaṅgrahe'pi, vāsudevaṃ sitaṃ vidyādraktaṃ saṅkarṣaṇaṃ tathā | dāmodaraṃ ca nīlābhamaniruddhaṃ tathaiva ca || śyāmaṃ nārāyaṇaṃ tadvattathā kṛṣṇaśca vaiṣṇavam | īṣadraktamanantaṃ ca śrīdharaṃ pītamucyate || iti | iti kṣetralakṣaṇam | atha śālagrāmacakralakṣaṇam | hemādrau purāṇāntare, vṛttasūtrāṣṭamo bhāga uttamaṃ cakralakṣaṇam | madhyamaṃ tu caturbhāgaḥ kanīyastu tribhāgikam || iti