Kalasara 20.p28

20.p28

pātralakṣaṇaṃ yājñavalkyaḥ,– na vidyayā kevalayā tapasā vāpi pātratā | yatra vṛttamime cobhe taddhi pātraṃ pracakṣate || mahāṃbhārate,– bhūmirgāvaḥ suvarṇaṃ vā dhānyaṃ vā yadyadipsitam | tatsarvaṃ grahaṇe deyamātmanaḥ śreya icchatā || candrasūryyayo rātridivasaviparyyāsena yadgrahaṇam | tatra snānādikaṃ na kāryyam | taduktaṃ nigame,– sūryyagraho yadā rācau divā candragrahastathā | tatra snānaṃ na kurvīta tadā dānaṃ na kutracit || grahaṇe bhojanābhāvamāha manuḥ– candrasūryyagrahe nādyādadyāt snātvā vimuktayoḥ | amuktayorastagayorddṛṣṭvā snātvā pare'hani || grahe grahaṇe, sparśakālamārabhya mocakālaparyyantaṃ grahaṇakāla iti mādhavācāryyāḥ | grahaṇāt pūrvvamapi bhojanābhāvamāha vyāsaḥ,– nādyātsūryyagrahātpūrvvamahni sāyaṃ śaśigrahāt | grahakāle ca nāśnīyātsnātvā(1) grahavimuktayoḥ || mukte śaśini bhuñjīta yadi na syānmahāniśā || amuktayorastagayoścādṛṣṭvā pare'hani