Kalasara 20.p29

20.p29

sārddhaprathamayāmādūrddhaṃ muhūrttacatuṣṭayaṃ mahāniśeti lakṣmīdharaḥ | pūrvvakāle bhojanavidherviśeṣamāha vṛddhavaśiṣṭhaḥ,– grahaṇañcedbhavedindoḥ prathamādadhiyāmataḥ | bhuñjītāvarttanātpūrvaṃ paścime prathamādadhaḥ || ravesyāvarttanādūrddhamarvāgeva niśīthataḥ | caturthaprahare cetsyāccaturthapraharādadhaḥ || rātrau prathamayāmātpūrvvaṃ(1) candragrahaṇaṃ cet, tadāvarttanānmadhyāhnātpūrvaṃ bhuñjīta | rātrau paścime cet, rātriprathamayāmādarvāk bhuñjīta •iti | sūryyasya tu dipāvarttanānmadhyāhnādūrddhaṃ grahaṇaṃ cet, tadā niśīthato'rddharātrādarvāk bhuñjīta | ahnaścaturthaprahare cet, rātricaturthapraharādadho bhuñjītetyarthaḥ | candragrahaṇe yāmatrayeṇa vyavadhānaṃ | sūryyagrahaṇe yāmacatuṣṭayeneti tātparyārthaḥ | tathā ca smṛtiḥ,– sūryyagrahe tu nāśnīyāt pūrvaṃ yāmacatuṣṭayam | candragrahe tu yāmāṃstrīn bālavṛddhāturairvinā || bālavṛddhāturaviṣaye tu mātsye,– aparāhne na madhyāhne madhyāhne na tu saṅgave | bhuñjīta saṅgave cetsyānna pūrvaṃ bhuktimācaret || agrimagrahe grastodaye vṛddhavaśiṣṭhaḥ,– grastodaye vidhoḥ pūrvaṃ nāharbhojanamācaret