Divyavadana 4.1

4.1

<4>sarva evānayena vyasanamāpatsyāmaḥ/ āgacchata, kriyākāraṃ tāvat karmah--tāvanna kenacicchroṇasya koṭikarṇasya mātāpitṛbhyāmārocayitavyam yāvad bhāṇḍaṃ pratiśāmitaṃ bhavati/ te kriyākāraṃ kṛtvā gatāḥ/ śroṇasya koṭikarṇasya mātāpitṛbhyāṃ śrutam--śroṇaḥ koṭikarṇo 'bhyāgata iti/ te kathayanti--pṛṣṭhata āgacchati/ pṛṣṭhato gatvā pṛcchatah--kva sārthavāhah? purastād gacchatīti/ taistāvadākulīkṛtau yāvad bhāṇḍaṃ pratiśāmitam/ paścāt te kathayanti--amba vismṛto 'smābhiḥ sārthavāha iti/ tābhyāmeka āgatya kathayati--ayaṃ śroṇaḥ koṭikarṇo 'bhyāgata iti/ tasya tāvabhisāraṃ dattvā pratyudgatau na paśyataḥ/ apara āgatya kathayati--amba, diṣṭyā vardhasva, ayaṃ śroṇaḥ koṭikarṇo 'bhyāgata iti/ tasya tāvabhisāraṃ dattvā pratyudgatau na paśyataḥ/ tau na kasyacit punarapi śraddadhātumārabdhau/ tābhyāmudyāneṣu svakasabhādevakuleṣu cchatrāṇi vyajanāni kalaśāni upānahāni cākṣarāṇi abhilikhitāni dattāni sthāpitāni--yadi tāvacchroṇaḥ koṭikarṇo jīvati, laghu āgamaya, kṣipramāgamaya/ atha cyutaḥ kālagataḥ, tasyaiva gatyupapattisthānāt sthānāntaraviśeṣatāyai/ tau śokena rudantāvandhībhūtau//