Prapancahridaya 3.p20

3.p20

icchecchaktaḥ svayaṃ pātuṃ samudramapi nāturaḥ || yatrecchati jagatyasmiṃstatraiva jaladarśanam | vinā kumbhādikaṃ pāṇau jalasañcayadhāraṇam ! rasādhikaṃ bhaveccāsya trayāṇāṃ dehadhāraṇam | nirvraṇatvaṃ śarīrasya pārthivaiśca samanvitam || tadidaṃ ṣoḍaśaguṇamāpyamaiśvaryamadbhutam | śarīrādagninirmāṇaṃ tattāpabhayavarjanam || śakyaṃ, jagadidaṃ dagdhuṃ yadīcchedaprayatnataḥ | sthāpanaṃ cālanaṃ cāpsu pāṇau pāvakadhāraṇam || dagdhasargo yathāpūrvaṃ smṛtyaivānnādipācanam | dvābhyāṃ dehavinirmāṇamāpyaiśvaryasamanvitam || etaccaturviṃśatidhā taijasaṃ paricakṣate | manojavatvaṃ bhūtā(ṅgeḥ ? ṅge) kṣaṇādantaḥpraveśanam || parvatādimahābhārabharaṇaṃ cāprayatnataḥ | gurutvaṃ ca laghutvaṃ ca pāṇāvāniladhāraṇam || aṅgulyagranipātādyairbhūmerapi ca kampanam | ekena dehaniṣpattiryuktaṃ bhogaiśca taijasaiḥ || dvātriṃśadguṇamaiśvaryaṃ mārutaṃ kavayo viduḥ | chāyāvihīnaniṣpattirindriyāṇāmadarśanam || khecaratvaṃ yathākāmamindriyārthaiḥ samanvayaḥ | ānilaiśvaryasaṃyuktaṃ catvāriṃśadguṇaṃ mahat