Prapancahridaya 3.p25

3.p25

kṣityāditattvavijayaṃ dhyātvā yadyabhivāñchati || tattattattvādhipāmeva mūrtiṃ sthūlāṃ vicintayet | sadāśivāntaṃ brahmādyāḥ śarvādayā aṣṭamūrtayaḥ || śivasya mūrtayaḥ sthūlāḥ śivaśāstraviniścitāḥ | ghorā miśrāḥ praśāntāśca mūrtayastā munīśvaraiḥ || phalābhilāpavaśataḥ cintyāścintāviśāradaiḥ | ghorāśceccintitāḥ kuryuḥ pāparo(gaṃ ? ga)ripukṣayam || sarvasiddhikarā miśrāḥ praśāntāḥ śāntidāyakāḥ | sidhyanti siddhayaḥ śīghraṃ ghore vapuṣi cintite || cireṇa miśre saumye tu na sadyo na cirādapi | saumye mūrtiviśeṣeṇa śāntiḥ prajñā prasādhyate || sidhyanti siddhayaścānyāḥ kramaśo nātra saṃśayaḥ | śrīkaṇṭhanāthaṃ smaratāṃ sadyaḥ sarvāstu siddhayaḥ || prasidhyantīti matvaike taṃ vai dhyāyanti yoginaḥ | sthityarthaṃ manasaḥ kecit sthūladhyānaṃ prakurvate || sthūle tu niścalaṃ ceto bhavet sūkṣme tu susthiram | īśe tu cintite sākṣāt sarvāḥ sidhyanti siddhayaḥ || mūrtyantareṣu dhyāteṣu parā siddhirna sidhyati | rucyabhyāsādinā yadyadīśvarūpaṃ vicintitam || lakṣayenmanasaḥ sthairyaṃ tattad dhyāyet punaḥ punaḥ | dhyānamādau saviṣayamante nirviṣayaṃ jaguḥ || tatra nirviṣayaṃ dhyānaṃ nāstītyeva satāṃ matam | buddherhi santatiḥ kāpi dhyānamityabhidhīyate