Prapancahridaya 3.p27

3.p27

dhyeyamityucyate sadbhistat svayaṃ parameśvaraḥ || vimuktipratyayaḥ pūrvamaiśvaryaṃ cāṇimādikam | śivadhyānasya tasyāsya sākṣāduktaṃ prayojanam || yasmāt saukhyaṃ ca mokṣaṃ ca dhyānādubhayamāpnuyāt | tasmāt sarvaṃ parityajya jñānaniṣṭho bhavenmuniḥ || nāsti jñānaṃ vinā dhyānaṃ nāsti dhyānamayoginaḥ | jñānaṃ dhyānaṃ ca yasyāsti tīrṇastena bhavārṇavaḥ || jñānaṃ prasannamekāgramaśeṣopādhivarjitam | yogābhyāsena yuktasya yoginastveṣa sidhyati || prakṣīṇāśeṣapāpānāṃ jñānadhyāne bhavenmatiḥ | pāpopahatabuddhīnā tadvārtāpi sudurlabhā || dhanuṣāṃ koṭibhiryogaḥ samantāt parirakṣati | sahasraiḥ ṣaṣṭibhirgaṅgā dharmakṣetraṃ tadardhataḥ || agnau kriyāvatāmeva divi devā manīṣiṇaḥ | pratimāsvaprabuddhānāṃ yogināmātmani sthitāḥ || īśamātmani paśyanti pratimāsu na yoginaḥ | ātmasthaṃ yaḥ śivaṃ tyaktvā bahiḥsthaṃ yajate śivam || karasthaṃ piṇḍamutsṛjya leḍhi kūrparamātmanaḥ | tīrthāni toyapūrṇāni devān pāṣāṇamṛnmayān || yogino na prapadyante svātmapratyayakāriṇaḥ | ātmasthaṃ tīrthamutsṛjya bahistīrthāni yo vrajet || karasthaṃ sa mahāratnaṃ tyaktvā kācaṃ vimārgati | yogināṃ hi vapuḥ sūkṣmaṃ bhavet pratyakṣameśvaram