Prapancahridaya 3.p28

3.p28

yathā sthūlamayuktānāṃ mṛtkāṣṭhādyaiḥ prakalpitam | yathehāntaścarā rājñāṃ priyāḥ syurna bahiścarāḥ || tathāntardhyānarahitāḥ priyāḥ śambhorna karmiṇaḥ | bahiḥkarmakarā yadvannātīva phalabhāginaḥ || dṛṣṭā narendrabhavane tadvadatrāpi karmiṇaḥ | jijñāsurapi yogasya yāṃ gatiṃ labhate muniḥ || na tāṃ gatimavāpnoti sarvaireva mahāmakhaiḥ | jñānaṃ yogaśca yasyāsti tīrṇastena bhavārṇavaḥ || yathā vahnirmahādīptaḥ śuṣkamārdraṃ ca nirdahet | tathā śubhāśubhaṃ karma jñānāgnirdahati kṣaṇāt || atyalpo'pi yathā dīpaḥ sumahannāśayet tamaḥ | yogābhyāsastathālpo'pi mahat pāpaṃ vināśayet || dhyāyataḥ kṣaṇamātraṃ vā śraddhayā paramaṃ padam | yad bhavet sumahat puṇyaṃ tasyānto naiva vidyate || nāsti jñānasamaṃ tīrthaṃ nāsti jñānasamaṃ tapaḥ | nāsti jñānasamo yajñastasmājjñānaṃ sadābhyaset || yadyantarā vipadyeta jñānayogārthamudyataḥ | prāpya puṇyakṛtāṃ lokānuṣitvā śāśvatīḥ samāḥ || śucīnāṃ śrīmatāṃ gehe yogabhraṣṭo'bhijāyate | jñānayogācca taṃ labdhvā sasāramativartate || jñānāmṛtena tṛptasya kṛtakṛtyasya yoginaḥ | naivāsti kiñcit kartavyamasti cenna sa tattvavit || dvijānāṃ vedaviduṣāṃ koṭiṃ saṃbhojya yat phalam