Prapancahridaya 3.p33

3.p33

tayordvayorbandhusnehādvipattiḥ pakṣadvayavyatyayato mṛtiḥ syāt || adhunā vakṣyate kālo yogināṃ bhuktimuktidaḥ | guptaḥ sa sarvaśāstreṣu śivena kathitaḥ purā || somādhaḥstho yadā bindurna dṛṣṭo yogavittamaiḥ | ṣaṇmāsaṃ jīvitaṃ tasya(?) nātra kāryā vicāraṇā || tasyopari trimāsaṃ syād dvimāsaṃ tasya vāmataḥ | ekamāsaṃ bhavet tasya dakṣiṇe vai na dṛśyate || madhye māsārdhamuddiṣṭaṃ jīvitaṃ hi na saṃśayaḥ | some'māvāsyāyāṃ ++praviṣṭe ravimaṇḍalam || tasmin kālaṃ tato jñeyād yogī yogaparāyaṇaḥ | sūryādhaḥsthaṃ daśāhaṃ syāt pañcāhaṃ tasya copari || tryahaṃ vā vāmato jñeyaṃ dvayahaṃ vā dakṣiṇe tathā | antarekāhamuddiṣṭaṃ nātra kāryā vicāraṇā || athānyaśca prayogo'sminnadhunā saṃpravakṣyate | nānābhedavibhedena bhedito yogibhiḥ purā || śuddhasphaṭikasaṃkāśaṃ dvādaśānte'valokayet | dvādaśāṅgulamāyāmaṃ śarīraṃ kālarūpiṇam || unmīlamīlakaraṇānmukulīmudrayā bhṛśam | dṛśyate nātra sandeho bhruvormadhye na cānyathā || aśiraḥ paśyate taccet ṣaṇmāsaṃ tasya jīvitam