Prapancahridaya 3.p34

3.p34

netrahīne yadā tasmin netrarogo bhaviṣyati || chinne haste yadā tasmin hastarogaṃ vinirdiśet| dhūmravarṇaṃ yadā paśyet kalahaḥ saṃprajāyate || athavā kathyate cānyat prayogo bhuvi durlabhaḥ | manujānāṃ hitārthāya śivena kathitaḥ purā || pṛṣṭhe tu dyumaṇiṃ kṛtvā svayaṃ padmāsane sthitaḥ | mudrāṃ tu mukulīṃ baddhvā tataśchāyāṃ nirīkṣayet || tato'nimeṣadṛg bhūtvā vyagre nabhasi kālavit | ātmacchāyāṃ punarvīkṣya tataḥ khamavalokayet || śuddhasphaṭikasaṃkāśaṃ nirmalaṃ pāpanāśanam | vigrahaṃ dṛśyate tasmin nātra kāryā vicāraṇā || yādṛśena prakāreṇa sthitaṃ tatraiva mānavaḥ | tādṛśaṃ paśyato vyomni chāyāpuruṣa uttamaḥ (?) || uttamāṅgavihīnāṃ tu chāyā yadyatha dṛśyate | ṣaṇmāsābhyantare tasya prāṇahānirna saṃśayaḥ || adṛṣṭe dakṣiṇe haste trimāsaṃ tasya jīvitam | vāmahaste vihīne tu māsamekaṃ prakīrtitam || ardhe māsārdhamuddiṣṭaṃ daśāhaṃ dakṣiṇe pade | vāme pañcāhamuddiṣṭaṃ nātra kāryā vicāraṇā || raktavarṇe'rthalābhaḥ syād vināśaḥ kṛṣṇavarṇake | sthūle vyayaṃ kṛśe lābhamitthaṃ jñeyaṃ vipaścitā