Vicaratrayi 13.1.12

13.1.12

nikhilaḥ sthūlaprapañcastaddraṣṭā cārthaḥ | dvitīyamātrāyāstaijasahiraṇyagarbhaśabdavācyaḥ svāpnaḥ sūkṣmaḥ prapañco draṣṭā cārthaḥ | tṛtīyamātrāyā avyākṛtaśabdavācyamūlāvidyā tadanubhāvitā cārthaḥ | ardhamātrārūpasyoṅkārasya 'nāntaḥprajña'mityādiniṣiddhasakalaviśeṣamahamiti
sāmānyataḥ prathamānamanubhavamātraṃ turīyamarthaḥ | anubhūyamānasyāntaḥprajñatvāderniṣedhe'pyātmānubhavasya niṣedhāyogāt | tatra sthūlaprapañcasya prathamamātrārthasya dvitīyamātrārthe sūkṣme prātibhāsike'bhedenānvayaḥ | tasya draṣṭāpi viśvaḥ sūkṣmadraṣṭari taijase'bhedenānveti
sūkṣmasya prātibhāsikasya sauṣupte mūlājñāne'bhedānvayaḥ taijasasyāpi mūlāvidyānubhavitari prājñe'bhedena | sauṣuptamūlāvidyāyāśca
nāntaḥprajñamityādilakṣite turīye bādhasāmānādhikaraṇyena, tatraiva
prājñasya mukhyasāmānādhikaraṇyena, sthūlasya svāpnābhedena prātibhāsikatvāpādanena, prātibhāsikasyāvidyāmayatvenāvidyāyāḥ ekarase brahmaṇi kathamapyasaṃbhavādasaṃbhavāccasvaprakāśaturīyābhedenāvasthātrayānubhaviturasaṅganityamuktatvamiti viśiṣṭavākyārthaḥ | 'traya
āvasathāstrayaḥ svapnāḥ, ayamātmā brahma sarvānubhūḥ, asaṅgo hyayaṃ
puruṣa' ityādiśrutibhyaḥ | avacchedakopādhāvavacchinne caitanye ca
khaṇḍaśaḥ śaktyaṅgīkārātpṛthaganvaye'pi na kṣatiḥ | bhāgatyāgalakṣaṇayā'vacchinnattvāṃśaparityāgena śuddhacidaṃśasyāpi turyānvayo na