Vicaratrayi 13.1.3

13.1.3

caitrādyātmanyeva mukhyavṛttiṃ svīkurvato dvitīyacaitraśabdārtha ātmotānyaḥ | anyaśceccetananāmatā na syāt | ātmā ceddevadattādiparyāyatāpattiḥ | caitradehādyupalakṣitaścettatrāpi caitradehaśabdayorātmanaivārthavattvānna dehopasthitiḥ | dehaśabdasya dehe eva vṛttyaṅgīkāre'pi
dehatyena yāvaddehānāmupalakṣaṇatvena punaḥ paryāyatāpattiḥ caitraśabdavaiyarthyāpattiśca | caitro'haṃ jānāmīti pratītyā dehātmanorabhedāṅgīkāraprayāso niṣphalaḥ | caitrāhaṃśabdayorātmanaikārthyāt | dehavācitve
tvabhedadvārā śabdapravṛttergauṇatā | pariṇāmyapariṇāminorvāstavābhedāsaṃbhavādādhyāsikaḥ saḥ | vāstavābhedāṅgīkāre dehanāśe'nātmatvaprasaṅgāt | cidaṃśapariśeṣe'pi tasya nāmatā syāt | tava cidacidātmavāditvāt | kasyacijjaḍāṃśasya pariśeṣe'pi āṃśikanāśasya
durvāratvāt | yasmindeśe dehaḥ patettatraiva tiṣṭhedyatra ghaṭastatra mṛdvat
śuddhacidaṃśasyaivātmatāṅgīkāre caitro'haṃ jānāmītyādipratītisahasrenāpyabhedo duḥsādhaḥ| caitro'haṃ mariṣyāmīti pratītyā''tmanāśo'pyaṅgīkṛtaḥ syāt | gataṃ tava vaikuṇṭhagamanamupāsanāphalam
nanu śarīraśarīriṇoḥ svarūpasvabhāvavailakṣaṇyādbhedeo'pi tena bhavellokāntaragamanamiti cenna | bhedābhedayoranyatarasyāvāstavatvāpatteḥ
vāstavatve'nyatarabuddhiranyatarabuddhiṃ pratibadhnīyāt | apratibandhakatve sarvatra sarvabuddhiprasaṅgaḥ | yathā śarīraśarīriṇorbhede satyapyabhedamaṅgīkaroṣi tathā ghaṭapaṭayorapyabhede kiṃ pratibandhakaṃ tava bhavet
yathāpratīti tadaṅgīkāra iti cetkimayuktā syānmeruḥ sarṣapa iti