Bhagavadgita 3.21

3.21

ta0 ṭī0-kathaṃ tarhi “ brāhmaṇo na hantavyaḥ” ityādi niṣedhaśāstrasya goghnabrahmaghnādernarakādiprāptividhāyakaśāstrasya ca sārthakyamityāśaṅkāparihārārthamāha-vedeti | avināśinaṃ vināśābhāvavantamata eva nityaṃ yato'jamavyayaṃ janmapariṇāmādirahitamenaṃ pratiśarīrabhinnamātmānaṃ yaḥ puruṣo veda jānāti he pārtha ! sa kathaṃ hanti kaṃ ghātayati | bahuṣveva kiṃśabdaprayogo loke śāstre ca dṛṣṭaḥ | tathā ca brāhmaṇādi śvapacapaśukṛmyantaśarīreṣu vināśānarhasvabhāvatayā vartamāneṣvātmasu kaṃ katamaṃ hanti hananakriyāyāḥ kartā bhavati kaṃ vā ghātayati tāṃ kriyāṃ prati prayojako bhavati na kaścidapītyarthaḥ | etena tvaṃ prayojako bhūtvā ghātayasi ahaṃ tvanniyukto hanmītyata ubhayoḥ pāpaṃ syāditi na śaṅkitavyamiti dhvanitam | evañca brāhmaṇādihanananiṣedhaśāstrasya hananajanyapāpaphalābhidhāyakasya ca uktātmasvarūpasvabhāvayāthātmyajñānābhāvavadviṣayakatvena sārthakyam |