Sadacarasmriti 3.p59

3.p59

bhoktṛśaktipradau nityaṃ bhoktārau ca viśeṣataḥ | nārāyaṇāniruddhau ca bhojyavastuṣu saṃsthitau | 1tarpakau sarvajīvānāṃ tasmād bhogyau na carvyataḥ | avakāśaprado nityaṃ vāsudevo nabhaḥ sthitaḥ | evaṃ pañcātmakaṃ viṣṇuṃ ya upāste sadā 2vibhum | avakāśapradaḥ so'pi 3svajātīnāṃ bhaviṣyati | śubhaṃ pivatyasau nityaṃ nāśubhaṃ sa hariḥ pivet | pūrṇānandamayasyāsya ceṣṭā na jñāyate kvacit | ityādyanusandhāya annamaya-prāṇamaya-manomaya-vijñānamaya-ānandamayātmakāniruddhapradyumnasaṅkarṣaṇavāsudevanārāyaṇātmakaśrīviṣṇuprītyarthaṃ prāṇāgnihotraṃ kariṣya iti saṅkalpya 'amṛtopastaraṇamasi' iti mantreṇodakaṃ prāśayet | taccodakaṃ 4uttarāpośanīyaṃ ca prāṇasya vastradvayamiti buddhyā pivet | taduktaṃ chāndogyabhāṣye - pañcamaprapāṭhake ādimakhaṇḍadvaye - siddhamevānnavastrādyaṃ viṣṇoḥ svātantryataḥ sadā | svārthaṃ samarpayed viṣṇau yathā prāṇe surāḥ purā | prāṇasya vastrabuddhyā tu bhojanobhayataḥ pivan | svarge muktau tathā divyavastralābhī bhavatyalam || iti