Lakshanamala 2.1-2.41

2.1-2.41

sādharmyasamādyātmikāyā jātereva lakṣyatayā'bhidhāne tu sādharmyasamāvaidharmyasametyādi
strīliṅgābhidhānamapyucitamiti | gṛhyamāṇaṃ viśeṣatvaṃ yatra yasya tadgṛhyamāṇaviśeṣatvaṃ tena gṛhyamāṇaviśeṣatvena prakaraṇasyānumānaprakaraṇasya pratijñāhetvādyudbhāvanasya
samatvaṃ yatra tatprakaraṇasamatvaṃ tena prakaraṇasamatvena, evaṃbhūtena sādharmyeṇa pratyavasthānaṃpratīpamavasthānaṃ dūṣaṇaprasañjanaṃ sādharmyasamo jātivikalpaḥ, sādharmyasamā jātirvetyarthaḥ
sādharmyeṇopasaṃhāre vādinā kṛte tadviparītasādharmyeṇa pratyavasthānaṃ sādharmyasamā jātiriti nirgalito'rthaḥ | yathā anityaḥ śabdaḥ utpattidharmakatvāt, yadyadutpattidharmakaṃ
tadanityaṃ yathā ghaṭādītyevaṃ vādinā prayukte yadyanityaghaṭasādharmyādanityaḥ śabdaḥ tadā
nityenākāśena sahāmūrttatvasādharmyeṇa śabdo nityaḥ prasajyeta ityevaṃ dūṣaṇaprasañjanaṃ
sādharmyasamaḥ, atra nityena saha sādharmyaṃ gṛhyamāṇaviśeṣatvaṃ prakaraṇasamatvaṃca bhavatītti
tena dūṣaṇaprasañjane uktalakṣaṇasamanvayaḥ