Bhaktimartanda p45.1

p45.1

bhakterjñāna upakṣayo dūṣito'pi punaḥ prakārāntareṇa dūṣyate | tatra bhakterjñānāṅgatvaṃ pūrvaṃ dūṣitaṃ jñānasya bhaktyaṅgatvavyavasthāpanenānupayoginaḥ | idānīṃ kāsucicchrutiṣu kāsucitsmṛtiṣu ca jñānotkarṣa āpātato bhāti sa nirasyate | tatra pūrvaṃ bhaktau jñānānupayogaḥ pradarśyate | sa cāntarābhūtagrāmavādisadhikaraṇe spaṣṭaḥ | tathāhi | nanu jñānamārge yathā pūrṇajñānasampattau svātmabrahmābhedānubhavātmikā vṛttirbhavati tathā bhaktimārge siddhabhakteḥ puruṣasya, bhaktyā māmabhijānātīti vākyotke jñāne svātmapuruṣottamābhedā'nubhavātmikā vṛttirbhavati, na veti saṃśaye antaryāmibrāhmaṇe, yaḥ pṛthivīmantaro yaṃ pṛthivī na veda yasya pṛthivī śarīraṃ yaḥ pṛthivīmantaro yamayatītyārabhya, ya ātmani tiṣṭhannityantairvākyaiḥ paramātmā sarvāntaratvena śrāvitaḥ | sa ca yadantastiṣṭhati taṃ svāntaḥsthāpayati vahniḥsvāyogolakamivyantaryāmibrāhmaṇe siddham | evañca śrautena yena kenāpi sādhanena tasminabhijñāyamāne svātmanastathā sattvena bhedāsphuraṇāt svātmatvena jñānaṃ bhavateveti pūrvapakṣe siddhāntamāha | antaretyādi | ayamarthaḥ | brahmaṇaḥ sarvāntaratve'pi etadātmanastadavibhaktatve'pi, sarvasya vaśī sarvasyeśāna ityādiśrutibhiḥ sarveśitṛtvādirūpeṇaiva jñānaṃ bhavati, na tu abhedasphuraṇamapi | utkaṭabhaktyā teṣāmeva sphuraṇāt | nanvabhijñāne sarvāṃśajñānadarśanāt tadaṃśājñāne ko heturiti cet | ucyate | iyadāpanāditi sūtre brahmānandād bhajanānandādhikyamuktam | sa bhajanānandastu kṛpā''dhikya eva bhavati |