Bhaktimartanda p57.4

p57.4

karturevedānīṃ sattvaṃ cedabhipretaṃ syānna līlānāmapi, tadā na nirūpayedeva | na pañcamaḥ | paricāyakatvena tannirūpaṇe vā tattatkartā jayatītyeva vadet | evañca sati gatyantarasadbhāve'pi yacchatrantasyaiva nirūpaṇaṃ tena līlānāmeva vartamānatvaṃ mukhyatayābhipretamityadhyavasīyate | naca viśeṣaṇatvenā'mukhyatvamiti vācyam | daṇḍī praiṣānanvāhaityatra yathā praiṣānuvādasya, lohitoṣṇīṣā ṛtvijaḥ pracarantītyatra ca tatpracārasya pūrvasiddhatvena na vidhānaṃ, kintu viśeṣaṇasyaiva daṇḍitvasya lohitoṣṇīṣatvasya ca | apūrvatvāt | tathā bhagavato vartamānatve saṃdehābhāvāttattallīlākaraṇasyaiva vartamānatvasyāpi nirūpaṇāt | na ṣaṣṭhaḥ | yadyapi vartamānasāmīpye vartamānavaddvesattanuśāsanādvartamānasāmīpyādevātrāpyevaṃ prayoga iti vaktuṃ śakyaṃ, tathāpi vakṣyamāṇaśrutipurāṇavākyairasaṃdigdhaṃ nisatayā nirūpaṇādatrāpi tadekavākyatāthai varttamānārtha eva prayoga iti niścīyate | yadyapi sāmīpye'pi tathā prayogastathāpi tatra tasya sādhutvaṃ jñāpyate | prayogaśca sāmīpyaguṇayogād gauṇa eva, na tu mukhyaḥ | sa ca mukhyārthabādhaeva kalpayituṃ yuktaḥ | tadbādhaprakāraścāgre vakṣyate | nānye ṣaṭ | daśamaskandha eva nāmakaraṇaprastāve sarvajñena gargā''cāryeṇa nirūpitaṃ, bahūni santi nāmāni rūpāṇi ca sutasya te ❉ guṇakarmānurūpāṇi tānyahaṃ veda no janā iti | atra hi nāmnāṃ rūpāṇāṃ ca bahūnāmeva santīti prayogeṇa varttamānatvaṃ bodhyate | tatrāpi guṇānāmaudāryādīnāṃ karmaṇāṃ kālīyadamanādīnāmanurūpāṇāṃ teṣāṃ tathātvaṃ bodhyate | anurūpatvaṃ tu tatsamayayobhyākārakriyādimattvam |