Dvadasharanayacakra 1.117

1.117

kiñcānyat, dṛṣṭāntasya pratyakṣatvāt, anumānatvāddhetoḥ, upanayasya upamānatvāt, āgamatvāt pratijñāyāḥ, dṛṣṭāntābhyupagamāt pratyakṣapramāṇīkaraṇamāpannam . tasmācca lokatvam, dṛṣṭāntasaṃvāditvapratipādanārthatvācchāstrārthasya tārkikāṇāṃ tarkairupatiṣṭhatāṃ vyākhyārtham . yathoktam --laukikaparīkṣakāṇāṃ yasminnarthe buddhisāmyaṃ sa dṛṣṭāntaḥ nyāyasū॰ 1 . 1 . 25 iti . tathā loko dṛṣṭāntaḥ, tadviruddhaṃ yadabhidhīyate tad dṛṣṭāntaviruddhamiti . tataḥ ko doṣa iti cet, pratijñātavyāghātaḥ . kiṃ pratijñātam ? śāstranirūpaṇaviparītamapramāṇam, na hariṇasvarūpādi, nirapavādatvāditi, tadvyāhanyate śāstrapramāṇīkaraṇe, pratyakṣabalāllokasya pravṛttatvāt .