Dvadasharanayacakra 1.166

1.166

kiñcānyat --prakārāvacchedetyādi yāvat sañcitagatereva . na prakāraḥ, avacchedaḥ, anavacchedaḥ, anekaprakārabhinnatvam ityetānyapi jñānāni bhavitumarhanti . kasmāt ? rūpāyatanasya sañcitagatereva, sañcitameva hi rūpāyatanaṃ gamyate nāsañcitam . ato na prakāraḥ iti jñānaṃ ghaṭate prakṛṣṭaḥ kāraḥ prakāraḥ nīlaḥ pīta iti, ayamasmādviśiṣṭa iti parasparato'tyantabhedābhāve prakārābhāvāt, abhedagateḥ sāmānye na tu prakārajñānaṃ ghaṭate, tathāvacchedo'nyasmādanyasya bhedābhedavikalpanāt, tathānavacchedaḥ, anekaḥ iti, anekena ca prakāreṇa bhinnaḥ iti bhinnānāmabhedagatiḥ . sañcitagaterabhedagateśca na prakārādijñānāni akalpanātmakāni svalakṣaṇaviṣayāṇi ca bhavitumarhanti . kimiva ? narasiṃhavat, yathā narasyākāro'dhastyaḥ siṃhasyākāraḥ śirobhāgaḥ, tadubhayābhedagaternarasiṃha ityucyate evaṃ prakārādijñānānyapi bhinne- ṣvabhedakalpanādeva syurnānyatheti . nare siṃhe ca narasiṃhāviti bhinnayorabhedagatyabhāvādadṛṣṭāntateti cet, na, sañcayayorevābhedarūpatvāt . narasiṃhānekaprakāragatirapi hītyādi, tayorhi pratyekaṃ nara iti siṃha iti ca bhinnayorapi prakāragatiryasmānnaratvasiṃhatvasañcayayoḥ, nīlādiparamāṇvādidravyāṇāṃ pūrvaṃ bhedena darśanādabhedakalpanātmikā bhedagatiriti yuktā, na tathā tu .