Dvadasharanayacakra 1.186

1.186

yadapi coktam --anekadravyotpādyatvāt tat svāyatane sāmānyagocaramityucyate na tu bhinneṣvabhedakalpanāt pra॰ samu॰ vṛ॰ 1 . 4 iti, sā tvadiṣṭā sāmānyagocaratāpi ca na ghaṭate, yasmānna tadanekadravyotpādyam . kutastarhyutpadyate ? sañcayāt . na ca sañcayaḥ sāmānyam, tato na ca sa rūpādibhyo bhedena kaścidasti rūpādisañcayaḥ . ata eva na pratyayasyālambanaṃ yujyate, pratyayo jñānam . kiṃ kāraṇam ? abhūtatvād vandhyāputravat . syādāśaṅkā--svābhāsajñānotpatterālambanaṃ bhaviṣyati samudāyo'kāraṇatve satyapīti . etat kutaḥ ? akāraṇatvādevālambanatvābhāve kā pratyāśā ābhāsārthasya ? ityata āha — anālambanatvācca ābhāsārtho'pi na tatrāsti . kimiva ? vandhyāputraputratvānābhāsanavat . yathā hyasattvādanālambanaṃ vandhyāputro'nālambanatvāccānābhāsastathā sañcaya iti .