Dvadasharanayacakra 1.206

1.206

kiñcānyat, uttaradoṣa ucyate'bhyupagamyāpi evaṃvidhālambanatāyāṃ cetyādi yāvat tvaduktapratyakṣālambanavaditi . anyathā vidyamānāḥ paramāṇavo'tīndriyatvena vidyamānāḥ samūhābhāsasyāpi jñānasya kāraṇaṃ bhavanti ityevaṃvidhālambanatāyāṃ satyāṃ dhūmo'gnipratyakṣajñānālambanaṃ syāt, tathā vidyamānatve'nyathābhāsasyāpi jñānasya kāraṇībhavanāt . dhūmatvena vidyamāno dhūmo'gnyābhāsasyānyābhāsasyāsvābhāsajñānasya kāraṇībhavannupalabhyata iti pakṣadharmatvamastyasya . tvaduktapratyakṣālambanavaditi dṛṣṭānte tasya sapakṣānugamanaṃ darśayati . yathā tvaduktasya pratyakṣasyālambanaṃ paramāṇavo'nyathā vidyamānāḥ paramāṇutvena vidyamānāḥ samūhābhāsajñānasya kāraṇaṃ bhavanti tathā dhūmo'pi tatsādharmyāt tajjanitajñānālambanasyāgneḥ pratyakṣālambanatayā vyāptatvāt pratyakṣālambanatāmātmanaḥ sādhayati . dhūmanimittāgnijñānaṃ vā pratyakṣaṃ syāt, tathā vidyamānatve'nyābhāsavijñānajanakārthālambanatvāt, tvaduktapratyakṣavat . tatsādharmyādeva vā tvaduktapratyakṣaṃ sahārthenāpratyakṣaṃ syād dhūmajanitāgnyarthajñānavat .