Dvadasharanayacakra 1.211

1.211

athavā yuktaiṣā kalpanā tvayāśrayituṃ svalakṣaṇaviṣayaṃ pratyakṣam ityetatpratijñānasaṃvāditvāt tannirvoḍhukāmena . yasmāt pratyekaṃ te samuditāḥ kāraṇam pra॰ samu॰ vṛ॰ 1 . 15 ityetat pratyakṣaviṣayasamarthanavacanamādipratijñānena tulyaṃ vartata iti ādipratijñānavat, ādipratijñānānurūpam, yā hi pratijñā svalakṣaṇaviṣayaṃ pratyakṣam iti saitena vacanena niruhyate, yasmāt svalakṣaṇaviṣayatvapratisamādhānena nirvahaṇametat svalakṣaṇaviṣayaṃ pratyakṣam iti ādau pratijñāya pratyekaṃ te samuditāḥ kāraṇamiti bruvatā'ṇūnāṃ svalakṣaṇatvāt pratyavekṣitapaurvāparyasādhyasādhanasambandhaṃ hi vaktavyam . aho sādhu, kintu punaratra devānāṃpriya bhavato doṣajātam . kiṃ tat ? anekārthajanyasvārthasāmānyagocaranirasanam, tatrānekārthajanyatvāt svārthe sāmānyagocaram pra॰ samu॰ 1 . 4 iti codyottarapakṣaparigraheṇa pratyavekṣitapaurvāparyasausthityārthanigamanavacanamanena tu nirasyate . atha mā bhūdeṣa doṣa iti pratyavekṣitapūrvāparānumata- ādipratijñātārthanirasanam . anekāntavaddvayorantayoravasthātavyam--pratyekatāyāṃ cāvastheyamagnyambhovacca tadaśakyaśakte samudāye, sākṣāt tvaduktatattvatvādanekaikatvabhṛśagatyarthasamudāyaparigrahācca . itarathāpi caiṣāṃ samudāya eva na syāt, pratyekamabhūtatvāt, vandhyāputravat . bauddhairevoktā trayātiriktasaṃskṛtakṣaṇikānityatvābhyupagamena sahāsaṅgatirasya, pratyeka- nigamanaparigraheṇa vā ādipratijñātārthanirasanam . vāśabdasya vikalpatvāt svalakṣaṇaviṣayapratyakṣatvaṃ vā nirasyate, anekārthajanyasvārthasāmānyagocaratā vā, ubhayaṃ vā nirasyata iti .