Dvadasharanayacakra 1.221

1.221

abhidhānāvyapadeśyānekātmakatve api ca naiva, anumitāgnivadevaikānekaviṣayatvānnīlasya . taddhi nīlarūpanirūpaṇaṃ vikalpaḥ, pratiparamāṇuparasparapratibhinnasvatattvānekarūpaikatattvaikarūpādhyāropāt sarvasarvātmakaikarūpavasturūpādyanekarūpādhyāropādvā rūpāntarasāmānyarūpaviṣayatvāt tadatadviṣayavṛttatvādanapohādapohādvā'gnyanumānavat tatsāmānyātmakataiva paramārthasthitasañcayaprajñaptinīlāṇubhedaparigrahātmakatvāt sādhāraṇārthaviviktakalpanātmakatvānna pratyakṣamapratyayapratyayātmakatvācchabdāśrāvaṇatvapratyayavat . saṃvṛtyatīndriyatvābhyāṃ hi na nīlādiṣu na ca sañcaye kāraṇatā tathāpratipattiṃ prati . anumānajñānamapi ca tanna pratipūryate, sambaddhagṛhītasyānyathāpratipatteḥ, viruddhādijñānavaditi samānametat kalpanātmakatvāt . anyadapi yathāsambhavaṃ tatprakriyāpatitaṃ muktvā yadubhayoḥ sāmānyaṃ tat sarvaṃ yojyam . evaṃ tāvadviśeṣāviśeṣaikāntavādayoḥ svavacanavyapekṣākṣepadustaravirodhatvāllaukikapratyakṣavilakṣaṇaṃ pratyakṣaṃ kalpitamapi tvayuktamityuktam .