Dvadasharanayacakra 1.84

1.84

avyaktamiti cet . syānmatam--avyaktāni vātakarkoṭakī-vañjula-japākusumādīnāṃ phalāni miti cet, na, vyaktikāryasya avyaktakāryatvādasattvatulyatvāt . bījādīnāmapyakāraṇataiva kvacidakaraṇāditi kāraṇamapyakāraṇameva, kāryakāraṇāvyabhicārābhāvāt . kāryasadasattvāniyamāttu kāraṇe kāraṇatāyāmeva karaṇākaraṇe kāryasya, aviditavedanārthavidhiparatāyāṃ vākyapravṛttestasyāmavasthāyāmanupajanitaviṣayatvādapavāda- kāryāṇīti . etaccāyuktam, vyaktikāryasya avyaktakāryatvādasattvatulyatvāt . vyaktiḥ kāryamasyeti vyaktikāryam . kiṃ tat ? kāryam . tasya kāryasya avyaktakāryatvāt, asattvena tulyam, tadbhāvo'sattvatulyatvam, tasmādasattvatulyatvānnāvyaktaṃ kāryamastīti . athavā vyaktiśca sā kāryaṃ tad vyaktireva kāryam, tadavyaktaṃ kāryamavyaktakāryam, tasyāvyaktakāryatvādasattvatulyatvam, tasmādasattad vātakarkoṭakyādipuṣpaphalam, nāvyaktaṃ kāryamiti .