Dvadasharanayacakra 2.199

2.199

kiñcānyat, yathaitat tathā kiñcidatyantānupalabdhisvabhāvameva bhavati ātmādi, ātmākāśa- kāladigādayaḥ kāryata eva nityamanumeyāḥ padārthāḥ saukṣmyād bāhyendriyāviṣayāstatsvabhāvāḥ . tatra nāstyātmā nāsti kālaḥ dharmādharmākāśadigādayo vārthā na santīti vṛthaiva vivadante śākyādayaḥ svabhāvabhedamavidvāṃsaḥ . tasmād yaducyate tvayā kriyāto ghaṭādi nirvartata iti tanna puruṣa-kāma-cāra-prayatnādibhyaḥ kiñcidapi nirvartate, puruṣāt tadicchātastatpravṛttestatprayatnād vīryādityarthaḥ . ādigrahaṇānna tadbuddheḥ na svāminiyogādibhyaḥ sarvatra vyabhicāradarśanāt . kiṃ tarhi ? bhūmyambvādivrīhyaṅkurādimṛdghaṭādyabhivyaktyanabhivyaktisvabhāvo ghaṭo'pi pṛthivyādisvabhāva eva vastutvāt tadātmatvāt, yathā--āpo dravāḥ, sthirā pṛthivī, calo'nilaḥ, mūrtihīnamākāśam, uṣṇo'gnirityādiṣu svabhāva eva, tatra kutaḥ kasyacidarthino'pyevaṃ vā viparyaya eva vārambha-kriyā-nirvṛttayaḥ, āpo dravā bhavantu, sthirā pṛthivī, calo'nilaḥ, agniruṣṇaḥ, viyadamūrtaṃ bhavatu ityevamarthino'pi puruṣasya nārambho na ceṣṭā na ca nirvṛttirvā tathā viparyaye'pi mā bhūd dravaṃ jalam, sthirā bhūḥ, calo'nilaḥ, agniruṣṇaḥ, amūrtamākāśam ityārambhaḥ kriyā nirvṛttirvā svabhāvasyānyathākartumaśakyatvāt . evaṃ ghaṭādiṣvapi yojyaṃ svābhāvikatvam .