Dvadasharanayacakra 2.201

2.201

syānmatam--kulālaprayatnapravṛttidaṇḍacakrasūtrodakamṛdādīnāṃ puruṣābhisandhyanurūpaghaṭādyutpattivināśavipariṇāmaphalaiḥ sambandhadarśanānna svabhāva eveti . etaccāyuktam, yasmāt pravṛttimṛdāṃ sa svabhāva eva, yathoktaṃ prāk nimittānāṃ nimittatā svābhāvikī iti, tasmāt svabhāva eva . kiñcānyat, phalasvabhāvānurūpāḥ pravṛttayo'ta eva vyavasthitāḥ, svabhāvabalādeva mṛtpiṇḍadaṇḍādibhireva ghaṭo bhavatīti jñātvā cakramūrdhni mṛtpiṇḍaṃ saṃsthāpya daṇḍagrahaṇacakrabhramaṇādivyāpārā ghaṭaphalayogyāḥ kriyāstadanurūpā vyavasthitāḥ . tathā turīvemaśalākādisādhanāḥ sūtropādāna-tantusantāna-pāyana-vayanakriyāḥ paṭaphalasvabhāvānurūpā vyavasthitāḥ . evaṃ kṛṣisevāvaṇijyāparivrajyādipravṛttayaḥ svabhāvameva hetuṃ samarthayantyo dṛśyante loke vyavasthitāḥ, āsāṃ nāpyutkarṣo nāpyapakarṣaḥ kaścit . phalānurūpāḥ pravṛttayaḥ pravṛttyanurūpaṃ phalaṃ tatra tatreti vyavasthitaphalapravṛttitā svabhāvādeveti .