Dvadasharanayacakra 2.208

2.208

anayā ca diśā śabdabrahmatattvabhedasaṃsargarūpavivartamātramidaṃ jagaditi . yathoktam— anādinidhanaṃ brahma śabdatattvaṃ yadakṣaram . vivartate'rthabhāvena prakriyā jagato yataḥ .. vākyapa॰ 1 . 1 ityādikāraṇavādā bhidyante saṃjñādibhedāt . te punaḥ sarve'pi paramārthadravyārthasya vidhividhinayasya svarūpamaspṛśanta eva pravartante, yasmāt saṅkṣepeṇāyaṃ sarvo'pi yatnaḥ so'nyabhinnasvarūpopādānenaiva svābhimatinirākaraṇāya bhavati, tadyathā--puruṣavādinaḥ puruṣādanyadavastu apuruṣatvād vandhyāputravat tathā niyateranyadaniyatitvād vartanādanyadavartanatvāt svabhāvādanyadasvabhāvatvād vandhyāsutavadavastu iti bruvatāṃ puruṣaniyatikālasvabhāvavādināmātmātmavastuno dravyārthavṛttasya tatparamārthasya tattvānāṃ sarvaikatvanityatvakāraṇamātratvasarvagatatvānāṃ dharmāṇāṃ pratipādanārthamudyatānāṃ vādinām anyadavastu iti svato bhinnānyārthābhyupagamenaiva tatpratipādanaṃ nānyatheti tatpratipādanārtho yatnaḥ so'yamanyabhinnarūpopādānamantareṇa nāstīti sa yatnaḥ svābhimatapuruṣādyarthanirākaraṇāyaiva bhavatyanyabhinnārthābhyupagamāt .