Dvadasharanayacakra 2.230

2.230

dravyaśabdasya ko'rthaḥ ? dravatīti dravyam, guṇasandrāvo dravyam pā॰ ma॰ bhā॰ 5 . 1 . 119, dravyaṃ bhavyaṃ yogyaṃ bhū prāptau pā॰ dhā॰ 1845 iti prāptiyogyamiṣṭārthaprāptiyogyaṃ dāru, kriyāvadādilakṣaṇaṃ dravyam, ityevamādi yathāsambhavaṃ lakṣaṇaṃ vācyam . iha tu bhavati bhavanaṃ bhāvaḥ . bhavati prācyacatuṣṭaye puruṣādisvabhāvānte, bhavanaṃ bhāvo'ntye pūrvoktavat, pūrvaviruddhatvānnayānāṃ dravati bhavati gacchati satatamiti dravyaṃ gatyātmakatvāt dravyaṃ ca bhavye pā॰ 5 . 3 . 104 iti vacanāt, na vikārāvayavāviti vidhinayāyuktatvād gatārtham .