Dvadasharanayacakra 2.47

2.47

api caivamityādi . kiñcānyat, atrāpi puruṣapramāṇakavādāpattiḥ . kiṃ kāraṇam ? uttarottaravirodha āśrito bhavati sāmānyādyarthaikāntavadeva . sa cāniṣṭhaḥ, paunaruktyāderasatkāryavādābhyupagamāt punastattyāgāt . ekāvasthāmātravicchinnapūrvāparatattvāgnyādibhinnavastutvābhiniveśavidhānācca kuryāditi kāraṇe kāryasyāsattvaikāntābhyupagamāt sarvagatasatkāryakāraṇavṛttitve parihāravicāraprāpyārthaparigrahāt, agnihotrahavanayoḥ paunaruktyādidoṣādvirodha ityukte anuvādavidhitve na iti parihāraḥ, punaraprasiddhatvādvirodha ityukte kuryādartho juhuyācchabdaḥ ityevamādivicāraiḥ prāpyo'rthastvayā parigṛhītaḥ, ataḥ svabuddhiprāmāṇyāvalambanāt puruṣapramāṇakastarka āśrito bhavati, tarkalakṣaṇaṃ ca avijñātatattve'rthe kāraṇopapattitastattvajñānārthamūhastarkaḥ nyā॰ sū॰ 1 . 1 . 40 iti . kimiva ? sāmānyādyarthaikāntavadeva, yathā sāmānyameva, viśeṣā eva, sāmānyaṃ viśeṣāśca ityekāntārthaparigrahe prāguktavidhinā pūrvottaravirodhaparihāraprāpyo'rtho'śakyaprāptiraphalaḥ puruṣapramāṇatvāt tathā'yamapi tarkaḥ . sa cāniṣṭha iti, api ca tarko'pratipūrṇo yadi na bhavedāśrīyeta, kintu na pratipūrṇaḥ . kasmāt ? doṣatrayāt . katamasmāddoṣatrayāt ? paunaruktyāderasatkāryavādābhyupagamāt punastattyāgāt . juhuyādukteḥ paunaruktyādidoṣāḥ prāguktavat .