Dvadasharanayacakra 2.59

2.59

yadapyetat tvayābhyupagataṃ kāraṇātmakasatkāryatvaṃ tadapyasamīkṣyābuddhipūrvakamevoktamityatastatpradarśanārthamāha --idaṃ cājñātamapi sat tvayā tattvamevaivaṃ vivektāraṃ prati pradarśitaṃ ghuṇākṣaravat . yathā ghuṇaḥ kāṣṭhamutkirannakṣarākārāmapi rekhāmutkirati yadṛcchayā tathā tvayedaṃ tattvamevaivaṃ kāraṇātmakasatkāryatvaṃ pradarśitam itikartavyataiva kartavyatā iti bruvatā . tat punarvivektāraṃ prati pradarśitam, itthamasatkāryaṃ bhavati, itthaṃ satkāryam iti yo vācyavācakasādhanasvarūpavivekajñastaṃ pratyeva pradarśitaṃ nātmatulyabuddhīn prati, darśayannapi svayaṃ tadvivekaṃ na cecchati .