Dvadasharanayacakra 2.65

2.65

prāptipratipādyaprasiddhāvagnihotre, prāptyā pratipādyā prasiddhirasya tadidaṃ prāptipratipādyaprasiddhi, tasmin prāptipratipādyaprasiddhau, kva ? agnihotre, yadagnaye ca prajāpataye ca sāyaṃ juhoti ityanayā prāptyā pratipādyaprasiddhau tu tasmin juhotiprayogo dānādiprasiddhyuparodhena dāhana eva tāvad vidheyaḥ, tāvacchabdaḥ kramārthe, juhoti ityayaṃ dhāturlokaprasiddhadānādanārtho na bhavati, kiṃ tarhi ? dahanenāgninā dāhayed ghṛtādi dravyam ityuktaṃ bhavati agnihotraṃ juhuyāt ityetaditi paribhāvya paścāt prasiddhe dāhane ghṛtena juhuyāt, ghṛtaṃ dāhayedagnim, agninā ghṛtaṃ dāhayet, agnirghṛtaṃ dahet iti jñātārthamanūdya itikartavyatāvidhiryokṣyate lokaprasiddhivaiparītyena vyutpādanāt, nānyathā . anyathā tu loke dāhanādiṣvadṛṣṭatvāt kathaṃ dāhanamanūdya ghṛtādītikartavyatā vidhīyate ? iti tathā'prasiddheravidhāyaka eva, kutastadanuvādaḥ ? itiśabdo hetvarthe, ityetasmāt kāraṇāt tathā tena prakāreṇa dāhanārthatvenāprasiddheḥ agnihotraṃ juhuyāt ityatraiva tāvajjuhuyācchabdo dāhanasyāvidhāyakaḥ, dūrata evānuvādaḥ . atraiva nanu sevādivat kartavyatāpratipattiritikartavyatābhyaḥ ityupakramya grantho yojyo yāvat vedavādāsādhutā vā tadvat iti . evaṃ tāvajjuhuyācchabdasya dāhanārthatvābhāvādayuktatvaṃ hotraśabdasya vā .