Dvadasharanayacakra 2.68

2.68

vyatyayādasya tadviṣayateti cet . syānmatam--lakṣaṇaśāstre'bhihitaṃ vyatyayo bahulam pā॰ 3 . 1 . 85 . pānapratyāyyārthatvācca, havanācca bhāvanamevamanavagamitamevābhipretasya syāt . prāptivihitasvarūpasiddheragnihotrasya svargakāmakarmatvābhidhānādavagamitakāmānurūpakarmoktestadvidhakriyāviśeṣagateḥ kriyāprāpyatvācca kāmasya andhalakāvagamita- suptiṅupagrahaliṅganarāṇāṃ kālahalacsvarakartṛyaṅāṃ ca . vyatyayamicchati śāstrakṛdeṣāṃ tadapi ca sidhyati bāhulakena .. pā॰ ma॰ bhā॰ 3 . 1 . 85 iti . tasmājjuhotyarthe juhuyācchabdaprayogāt prāptamevānūdyate tadviṣayatvādevāsyāpīti . etadapi na, ajñātatvādevānanuvādatvāt, savyāpāraṇārthaśabdadarśanānna nirvyāpāraṇārthapratipattiryuktā vyavasthālopaprasaṅgāt . tasmādajñātārthatvādananuvādataiva, ananuvādatvānnaitadapi yuktamiti . kiñcānyat, kośapānapratyāyyārthatvācca . idaṃ tvayā sannihitadevatākośapānena pratyāyyam, viśeṣaliṅgābhāvāt kuta eva jñāyate juhotyarthe juhuyācchabdaḥ prayukto na svārtha eva, juhotirvā juhuyādarthe prayukta iti ? tasmādaviditārthatvād vidhitvam, vidhitvācca nānuvādaḥ, ananuvādatvāccaivamapi na yuktam . abhyupetyāpi juhotyarthe juhuyācchabdasya vṛttiṃ doṣaṃ brūmaḥ --havanācca bhāvanamevamanavagamitamevābhipretasya syāt . vidhyarthābhāvāt puruṣo havanakarmaṇi aniyojita eva, tato bhāvanaṃ svargākhyasya viśiṣṭasukhalakṣaṇasya deśaviśeṣasya vā viśiṣṭasukhasādhanabhūtasyābhipretasyārthasya nāvabodhakaṃ syād yadarthamabhivṛttamidaṃ vākyam, svargākhyaphalasādhane'gnihotrakarmaṇi puruṣaṃ niyokṣyāmīti tadarthaṃ hi vākyam agnihotraṃ juhuyāt ityetat pravṛttam, etenaiva karmaṇā svargo bhāvyate, tasmāt idaṃ kuru iti tadarthajñāpanābhāve kimanena vākyena juhoti juhoti ityuktena ?