Dvadasharanayacakra 2.78

2.78

athaitasmādaniṣṭāpattidoṣād dṛṣṭeṣṭavirodhādapasarpan brūyāstvam --na kāryaprādurbhāvavat khapuṣpaprādurbhāva iṣyate, asacca kāryamiti niścitam . tataḥ ko doṣa iti cet, ucyate --tadvailakṣaṇyānna tarhyasat khapuṣpam, asatkāryavailakṣaṇyānnedānīmasat khapuṣpam, kintu saditi prāptam . asatkāryavailakṣaṇyaṃ khapuṣpasyāyatyāmaprādurbhāvaḥ, tasmādasatkāryavailakṣaṇyādāyatyāmaprādurbhāvānna tarhyasat khapuṣpam, kiṃ tarhi ? sat, ko hetuḥ ? asadvilakṣaṇatvāt, asatā kāryeṇa saha vilakṣaṇatvāt . dṛṣṭānto ghaṭavat, yathā ghaṭo'sadvilakṣaṇatvāt sannevaṃ kharaviṣāṇamapyāyatyāṃ prādurbhavatā kāryeṇa vailakṣaṇyāt sat prasaktam . itara udumbarapuṣpavat, itara iti vaidharmyadṛṣṭāntaḥ, yadasat tadasadvilakṣaṇaṃ na bhavati yathodumbarakusumamiti parasyāniṣṭāpādanārthatvādasadvaidharmyaṃ khapuṣpasyeti . nanu ghaṭāsattvaṃ paṭāsattvavilakṣaṇam . syānmatam--ghaṭasyā athaivamapi vailakṣaṇye khapuṣpāsattvaniścayo na nivartate'prādurbhāvātmakaṃ ca tat, na tarhi prādurbhāvātmakatvāt kāryamasad nirvṛttaghaṭavat . asattva āyatyāṃ na prādurbhavet, asattvāt, khapuṣpavat . śeṣaṃ pūrvavadeva viparyayeṇa . sattvaṃ paṭātmanā, paṭāsattvaṃ ghaṭātmaneti tayoritaretarābhāvalakṣaṇāsattvaṃ vailakṣaṇyaṃ ca parasparato dṛṣṭam, tau ca ghaṭapaṭau santau, tasmādasadvailakṣaṇyasya satyapi darśanādanaikāntikateti cet, ucyate --na, sato vailakṣaṇyāt . nānaikāntikatāsya hetoḥ, sato vailakṣaṇyāt . sata eva vailakṣaṇyam, taddhītaretarābhāvātmakaṃ vailakṣaṇyaṃ sata eva, nāsataḥ . tasmādasato vailakṣaṇyaṃ na bhavati, kiṃ tarhi ? sadvailakṣaṇyamapi tat sata evetarāpekṣayā tadrūpeṇāsattvāt . ayaṃ tu kāryasyāyatyāṃ prādurbhāvo'satā khapuṣpeṇātyantavilakṣaṇo'prādurbhāvaśca khapuṣpasya kāryeṇāsateti nāsti sato vailakṣaṇyaṃ satā tadviśeṣadharmatvād rūpādiviśeṣadharmāvailakṣaṇyavat . athavā sato'vailakṣaṇyāt, sataḥ availakṣaṇyāt . satastu ghaṭādeḥ paṭādinā saha vailakṣaṇyaṃ nāstyeva, sattvānvayāviśeṣād deśakālākārādimātraviśeṣasyāviśeṣatvāt, aṅgulyādiviśiṣṭākāśāviśeṣavat .