Dvadasharanayacakra 2.79

2.79

athavā na tarhyasat khapuṣpam . kasmāddhetoḥ ? sadasadvilakṣaṇatvāt, satā'satā ca vilakṣaṇatvāt . sacca dvividham--tulyajātīyaṃ ghaṭasya ghaṭa eva, atulyajātīyaṃ paṭādi . asacca kāryamāyatyāṃ bhāvādaṅkurādi . khapuṣpamatyantāprādurbhāvāt kāryeṇāsatā vilakṣaṇaṃ satā ca ghaṭapaṭādinā tvanmatena itaretarābhāvavailakṣaṇyena tulyajātīyena atulyajātīyena ca bhāvānāṃ parasparavailakṣaṇyavad, dṛṣṭānto ghaṭavaditi, yathā ghaṭastulyajātīyebhyo ghaṭāntarebhyo'tulyajātīyebhyaśca paṭādibhyaḥ sadbhyo vilakṣaṇo'sataśca khapuṣpādeḥ saṃśca dṛṣṭastathā khapuṣpaṃ ghaṭavat sadasadvilakṣaṇatvānnāsat, sadevetyarthaḥ, dviḥ pratiṣedhaḥ prakṛtiṃ gamayatīti kṛtvā . itara udumbarapuṣpavat, yadasat tanna sadasadvilakṣaṇam, yathodumbarapuṣpam . tvanmatyaivātrāpi vaidharmyadṛṣṭāntaḥ, khapuṣpakharaviṣāṇodumbarapuṣpādīnāmasattvāviśeṣādaniṣṭāpādanasāmyāt sādhyāntaḥpātī . tasmād vaidharmyadṛṣṭāntena nārthaḥ . astu tadā sadvilakṣaṇatvamitaretarābhāvāpekṣatvāt, kathamasadvilakṣaṇaṃ khapuṣpamiti cet, āyatyāṃ prādurbhavatā kāryeṇāsatā vailakṣaṇyasya tvayaivābhyupagatatvāt tvanmatanivāraṇārthatvādasya prayāsasya nāsmākaṃ doṣa iti .